کراچی(این این آئی)مہک مقبول نے وزیرِ اعلیٰ سندھ سید مراد علی شاہ کو شطرنج میں ہرا دیا۔وزیرِ اعلیٰ مراد علی شاہ نے انڈر 18 قومی جونیئر شطرنج چیمپئن مہک مقبول کو مقابلے کی دعوت دی تھی۔وزیرِ اعلیٰ سندھ سید مراد علی شاہ کے ترجمان کے مطابق مہک مقبول نے وزیرِ اعلیٰ سندھ کو 15 مووز سے چیک میٹ کیا۔ بعدازاں انہوں نے مہک مقبول کو مبارکباد دی۔

مراد علی شاہ نے کہا کہ مہک مقبول نے سرکاری اسکول میں بہتر تعلیم کے ساتھ شاندار کارکردگی دکھائی۔مراد علی شاہ اور انڈر 18 قومی جونیئر شطرنج چیمپئن مہک مقبول کے درمیان شطرنج کا مقابلہ ہفتہ کی سہ پہر 3 بجے ہوا۔اس موقع پر وزیرِ تعلیم سندھ سردار شاہ، وزیرِ کھیل محمد بخش مہر، آغا خان فاؤنڈیشن کے سلطان الانا اور زندگی ٹرسٹ کے شہزاد رائے بھی موجود تھے۔مہک مقبول سماجی کارکن اور گلوکار شہزاد رائے کے زندگی ٹرسٹ کے ایس ایم بی فاطمہ جناح اسکول کی طالبہ ہیں۔

انہوں نے انڈر 18 ٹائٹل جیت کر قومی جونیئر چیمپئن کا اعزاز اپنے نام کیا تھا۔بعدازاں شہزاد رائے نے کہا کہ طالبہ مہک نے وزیرِ اعلیٰ سندھ کو شطرنج کے کھیل میں ہرا دیا، طالبہ کھیل کے دوران بہت پْراعتماد تھی۔شہزاد رائے نے کہا کہ مقابلہ کچھ دیر ہی چلا تھا، وزیرِ اعلیٰ سندھ نے بہت اچھا کھیلا۔انہوں نے کہا کہ بچوں کو اسکرین سے دور لے جانے کے لیے شطرنج کی طرف لانا ہوگا، وزیرِ اعلیٰ کے لیے خوشی کی بات ہے کہ انہیں انہی کے اسکول کی بچی نے ہرایا۔