فیصل آباد(این این آئی)پاکستانی نژاد برطانوی بزنس مین نے فیصل آبادکے علاقے کمالیہ میں یتیم خانہ بنانے کا اعلان کیا ہے جہاں یتیم بچوں کیساتھ ان کی مائیں بھی رہ سکیں گی۔برطانیہ میں آئی ٹی کا کامیاب بزنس کرنیوالے لیاقت علی نے اس ادارے کا نام آغوش فاطمہ رکھا ہے جس کیلئے انہوں نے اپنی کروڑوں روپے کی ذاتی 52کنال زمین وقف کردی ہے۔
ہیلپ فاؤنڈیشن کے سی ای او لیاقت نے جمعہ کونیشنل پریس کلب اسلام آباد میں پریس کانفرنس کرتے ہوئے کہا کہ دو سال میں مکمل ہونے والے اس منصوبے پرابتدائی طور پر ایک ارب روپے خرچ آئے گا، ہم اوورسیز پاکستانیوں کی مدد سے اس منصوبے کو مکمل کریں گے اور یہ تارکین وطن کی جانب سے پاکستانی عوام کیلئے ایک تحفہ ہوگا،یہ یتیم خانہ نہیں ہوگا بلکہ ایک سینٹر ہوگا جہاں نادار خواتین اپنے بچوں کیساتھ رہ سکیں گی، ان کو رہائش کھانا پینا، تعلیم اور صحت کی سہولیات مفت فراہم کی جائیں گی۔اس منصوبے کے سینٹر بنانے کیلئے تمام اخراجات اورسیز پاکستانیز دے رہے ہیں، یتیموں کی کفالت کرنیوالا آخرت میں بہت بڑا درجہ پائے گا۔
