بہاولپور (این این آئی)بہاولپور میں فصلوں سے لکڑیاں اٹھانے پر مبینہ طور پر زمیندار نے محنت کش کی بیوی پر پالتو کتے چھوڑ دئیے۔ریسکیو نے زخمی خاتون کو پہلے رورل ہیلتھ سینٹر منتقل کیا، حالت تشویشناک ہونے پر بہاولپور وکٹوریہ ہسپتال منتقل کردیا گیا، زخمی خاتون کے خاوند کی مدعیت میں پولیس نے مقدمہ درج کرکے ملزمان کی تلاش شروع کردی۔
بہاولپور میں یزمان کے علاقہ چک 128 ڈی این بی میں پالتو کتوں کے حملے سے مزدور کی بیوی شدید زخمی ہوگئی۔ متاثرہ خاتون کے شوہر کا کہنا ہے کہ اس کی بیوی گھر میں جلانے کیلئے علاقے سے لکڑیاں اٹھانے گئی تو زمیندار اور اس کے ساتھیوں نے پرانی رنجش کی بنا پر میری بیوی پر کتے چھوڑ دیے اور شکاری کتوں نے میری بیوی کو بری طرح نوچ ڈالا۔ محنت کش نے اپنی بیوی پر کتوں سے حملہ کروانے والے ملزمان کی فوری گرفتاری اور انصاف کیلئے وزیر اعلیٰ پنجاب سے نوٹس لینے کا مطالبہ کیا ہے۔
