رحیم یارخان(این این آئی)سربراہ جے یوآئی (ف) مولانا فضل الرحمن نے کہا ہے کہ کارکن مخلص اور قیادت کے کہنے پر چلتا ہے،پی ٹی آئی اپنے طرز عمل پر غور کرے،ہمیشہ آزادی صحافت کی بات کی، صحافیوں کو بھی چاہیے وقت کی نزاکت کو سمجھیں۔رحیم یار خان میں پریس کانفرنس کرتے ہوئے جے یو آئی سربراہ نے کہاکہ اس وقت ضرورت اس بات کی ہے کہ ہم قوم کو درست رخ دے سکیں، جلسے، احتجاج کو اپنے اور دوسروں کیلئے بھی حق سمجھتا ہوں۔

انہوں نے کہاکہ ڈی چوک پر جو ہوا غلط ہوا، پی ٹی آئی کی اپنی جماعت ہے وہ اپنے طرز عمل پر غور کرے، کارکن مخلص اور قیادت کے کہنے پر چلتا ہے۔فضل الرحمان نے کہاکہ ہم نے پی ٹی آئی کے دور میں بڑا احتجاجی مارچ کیا، اس احتجاج میں کوئی گملا ٹوٹا اور نہ ہی نقصان ہوا۔ سربراہ جے یو آئی نے کہا کہ ہم نے ہمیشہ آزادی صحافت کی بات کی، صحافیوں کو بھی چاہیے وہ وقت کی نزاکت کو سمجھیں۔جے یو آئی سربراہ نے کہا کہ خیبرپختونخوا اور بلوچستان کے حالات ٹھیک نہیں ہیں اور دونوں صوبوں کی حکومتیں امن و امان کے قیام کیلیے اقدامات نہیں کررہیں۔