اسلام آباد (این این آئی)پی ٹی آئی پارلیمانی کمیٹی کے اجلاس سے اسلم گھمن کو باہر نکال دیا گیا۔پیر کو اپوزیشن لیڈر عمر ایوب کی زیر صدارت پی ٹی آئی کی پارلیمانی کمیٹی کا اجلاس ہوا جس میں سلمان اکرم راجہ، زرتاج گل، اسد قیصر، عامر ڈوگر، ثنا اللہ مستی خیل، محمد خان، شاندانہ گلزار، خواجہ شیراز، عاطف خان اور شاہد خٹک شریک ہوئے۔
دورانِ اجلاس جوڈیشل کمیشن میں پی ٹی آئی کے نامزد لوگوں کے ناموں پر مباحثہ کیا گیا اور شوکاز وصول کرنے والے ممبران اسمبلی کے استعفوں بھی غور کیا گیا،اس دوران اسلم گھمن کو پارلیمانی پارٹی کے اجلاس سے نکال دیا گیا،وہ روم نمبر فائیو پہنچے تو انہیں باہر جانے کو کہا گیا۔ذرائع کے مطابق پارلیمانی کمیٹی میں موجود ارکان نے اسلم گھمن کی شرکت پر اعتراض کرتے ہوئے کہا کہ جن کو شوکاز جاری ہوئے وہ اجلاس میں شریک نہیں ہو سکتے۔اسلم گھمن کے باہر آنے پر صحافی نے ان سے سوال کیا کہ سر آپ کو باہر کیوں نکالا گیا؟ جس پر انہوں نے جواب دیا کہ میں نماز پڑھنے جا رہا ہوں۔
