اسلام آباد (این این آئی)پاکستان تحریک انصاف کے ساتھ جھڑپوں میں اسلام آباد پولیس کے کانسٹیبل عبدالحمید شاہ کی ہلاکت کا مقدمہ تھانہ نون میں درج کر لیا گیا۔میڈیا رپورٹ کے مطابق درج مقدمے میں بانی پی ٹی آئی عمران خان، وزیر اعلیٰ خیبر پختونخوا علی امین گنڈاپور اور اعظم سواتی کو نامزد کیا گیا ہے، مقدمے میں بیرسٹر سیف، عمر ایوب اور عامر مغل سمیت 500 نامعلوم افراد کو بھی نامزد کیا گیا ہے۔ تھانہ نون میں درج مقدمے میں اقدام قتل، اغوا، اور دہشت گردی سمیت 12 دفعات شامل کی گئی ہیں۔

ایف آئی آر کے متن میں کہا گیا کہ عامر مغل نے شرکا کے ساتھ مل کر کانسٹیبل عبد الحمید کو زبردستی پکڑ کر ان پر لاتوں، مکوں، ڈنڈوں اور پتھروں سے تشدد کیا تھا۔ایف آئی آر کے مطابق عامر مغل اور ساتھی پولیس پر فائرنگ کرتے ہوئے عبدالحمید کو اغوا کرکے لے گئے تھے۔اس کے بعد ملزمان عبدالحمید کو بڈھانہ لنک روڈ پر بیہوشی اور زخمی حالت میں چھوڑ کر فرار ہو گئے تھے۔عبدالحمید کو زخمی حالت میں پمز ہسپتال منتقل کیا گیا تھا جہاں وہ زخموں کی تاب نہ لاتے ہوئے شہید ہوگئے تھے۔