کراچی (این این آئی)سندھ ہائی کورٹ نے ایکس ٹوئیٹر کی بندش کے خلاف درخواستوں کی سماعت دو ہفتوں کے لئے ملتوی کردی ۔جمعرات کو سندھ ہائی کورٹ میں ایکس ٹوئیٹر کی بندش کے خلاف درخواستوں کی سماعت ہوئی ہے۔پی ٹی اے کے وکیل نے ایکس کی بندش سے متعلق نوٹیفیکیشن واپس لینے کی تصدیق کردی۔وکیل پی ٹی اے احسن امام نے بتایا کہ ایکس کی بندش سے متعلق نوٹیفیکیشن واپس لیا جاچکا ہے۔

عدالت نے استفسار کیا کہ اگر نوٹیفیکیشن واپس لے لیا گیا تو ایکس بحال ہوگیا؟وکیل درخواست گزار معیز جعفری نے موقف اختیار کرتے ہوئے بتایا کہ ٹوئیٹر تک رسائی تاحال ممکن نہیں ہوسکی۔عدالت نے ریمارکس دیتے ہوئے کہا کہ ایکس کی بندش کا اب کوئی نوٹیفیکیشن نہیں ہے۔اس کا مطلب یہی ہے کہ ایکس بحال ہوگیا ہے۔وکیل پی ٹی اے سعد صدیقی نے موقف اختیار کرتے ہوئے بتایا کہ مجھے نوٹیفیکیشن واپس لیئے جانے سے متعلق کوئی معلومات نہیں۔عدالت نے ریمارکس دیتے ہوئے کہا کہ پی ٹی اے نے ہر درخواست کے لئے الگ وکیل رکھا یے۔یہ تو غلط ہے ایک وکیل کو آگہی دی گئی دوسرے کو نہیں۔

وکیل درخواست گزار نے بتایا کہ 28 مارچ کو وفاقی حکومت نے جواب جمع کروایا کہ ایکس کام کر رہا ہے۔لیکن تاحال ایکس پر پابندی عائد ہے۔بغیر کسی وجہ کے کسی بھی سوشل میڈیا سائیٹ کو بند نہیں کیا جاسکتا۔ڈپٹی اٹارنی جنرل نے کہا کہ انٹیلیجنس کی معلومات پر ایکس کو بند کیا گیا تھا۔عدالت نے ریمارکس دیتے ہوئے کہا کہ آپ کو ایکس کی بندش پر وجوہات دینی چاہئیں۔درخواست گزار وکیل عبدالمعیز جعفری نے بتایا کہ توہین عدالت کی درخواست بھی دائر کی گئی ہے لین عدالتی احکامات کے باوجود ایکس بند یے۔عدالت نے ایکس کی بندش سے متعلق دیگر درخواستوں کی سماعت دو ہفتوں کے لئے ملتوی کردی۔