راولپنڈی (این این آئی)بانی پی ٹی آئی کی ہمشیرہ علیمہ خان نے کہا ہے کہ القادر کیس میں جج صاحب بھاگ رہے ہیں، ضمانت کو سن نہیں رہے۔اڈیالہ جیل راولپنڈی کے باہر میڈیا سے گفتگو کرتے ہوئے علیمہ خان نے کہا کہ بانی پی ٹی آئی نے واضح کہا ہے کہ سنگجانی میں جلسہ ہوگا۔علیمہ خان نے کہا کہ9مئی کو خواتین کے ساتھ ظلم ہوا، عالیہ حمزہ پر بہت ظلم ہوا، ان کو متعدد جیلوں میں گھمایا گیا۔

انہوں نے کہا کہ اب بھی عالیہ حمزہ کو دھمکیاں مل رہی ہیں۔ علیمہ خان نے کہا کہ 8 فروری کو مائیں نکلی تھیں، 8 ستمبر کو بھی نکلیں گی۔ انہوںنے کہا کہ حکمرانوں کے لائف اسٹائل کی قیمت ہم سب کو بھگتنا ہوگی۔اس موقع پر عالیہ حمزہ نے کہا کہ میرا قائد کبھی نہیں کہے گا کہ مجھے آزاد کرائو۔ 8ستمبر پاکستان کو بچانے کا دن ہے، اس روز تحریک کا اعلان ہوگا۔