اسلا م آباد(این این آئی)وزیر دفاع خواجہ محمد آصف نے کہا ہے کہ جب تک 9مئی کا حساب نہیں ہوتا کسی قسم کے مذاکرات نہیں ہوں گے،پی ٹی آئی سیاسی جماعتوں سے مذاکرات سے انکاری ہے اور وہ اسٹیبلشمنٹ سے این آر او کیلئے مذاکرات کرنا چاہتی ہے۔

پیر کو قومی اسمبلی میں اپوزیشن کے نکتہ اعتراض کا جواب دیتے ہوئے خواجہ محمد آصف نے کہا کہ ہمیں این آر او لینے کے طعنے دینے والے اس وقت خود این آر او مانگ رہے ہیں، ان کا ایک پارٹی لیڈر رئوف حسن ہاتھ جوڑ کر این آر او مانگ رہا ہے، کل بھی ان کا اس حوالہ سے بیان آیا ہے، بانی پی ٹی آئی بھی جیل سے اسٹیبلشمنٹ کے ساتھ مذاکرات کرنے کے بیانات دے رہا ہے، وہ سیاسی جماعتوں کے ساتھ مذاکرات سے انکاری ہیں جبکہ اسٹیبلشمنٹ کے ساتھ مذاکرات کرنا چاہتے ہیں، کیا محمود خان اچکزئی اسٹیبلشمنٹ سے ان کی جگہ مذاکرات کریں گے؟ اس حوالے سے محمود خان اچکزئی کا موقف بھی آنا چاہئے، بانی پی ٹی آئی یہاں بیٹھی جماعتوں کے ساتھ مذاکرات نہیں کرنا چاہتے۔

انہوں نے کہا کہ جن کی گود میں انہوں نے پرورش پائی وہ گود بار بار یاد آتی ہے جبکہ یہ بھول جاتے ہیں کہ یہ ایک نیا نظام اور نئی قیادت ہے۔ انہوں نے کہا کہ اگر انہوں نے اسٹیبلشمنٹ کے ساتھ مذاکرات کرنے ہیں تو ضرور کریں لیکن بار بار محمود خان اچکزئی کا مذاکرات کیلئے نام دے رہے ہیں تو یہ پہلے فیصلہ کر لیں کہ انہوں نے کس سے مذاکرات کرنے ہیں کیونکہ سیاسی جماعتوں سے یہ مذاکرات سے انکار ی ہیں، ہمارا ان کیساتھ کوئی تنازعہ نہیں ہے، یہ موجودہ حالات میں اسٹیبلشمنٹ سے ریلیف چاہتے ہیں۔