لاہور ( این این آئی) پنجاب میں رحیم یار خان کے کچے کے علاقے میں ڈاکوئوں کے حملے میں شہید اہل کاروں کی ایک ویڈیو سوشل میڈیا پر وائرل ہو گئی، جس میں وہ گفتگوکے د وران اپنی شہادت کا ذکر کررہے ہیں۔سماجی رابطوں کے پلیٹ فارمز پر وائرل ویڈیو کچے کے علاقے میں ڈاکوئوں کے راکٹ حملے میں شہید ہونے سے کچھ دیر پہلے کی ہے، جس میں اہل کار شہید ہونے کے حوالے سے آپس میں بات کررہے ہیں۔

ویڈیو میں سنا جا سکتا ہے کہ ایک پولیس اہل کار اپنے ساتھی ابرار کو ازراہ تفنن مخاطب کرتے ہوئے کہتا ہے کہ یہ لو رائفل پکڑو، لگتا ہے آج آخری وقت آ گیا ہے (یعنی لگتا ہے آج تو شہید ہو جائیں گے)۔ کچے میں اپنے فرائض کی انجام دہی کے لیے جانے والے پولیس اہل کار گفتگو میں مزید کہتے ہوئے سنے جا سکتے ہیں کہ ہم جہاں پر رات (کی تاریکی)میں (ڈیوٹی کے لیے) جار ہے ہیں، یہاں تو کوئی دن (کی روشنی) میں بھی نہیں آتا۔واضح رہے کہ ویڈیو میں دکھائی دینے والا پولیس کانسٹیبل ابرار جمعرات کی شب ڈاکوئوں کے راکٹ حملے میں شدید زخمی ہوگیا تھا جب کہ ماچھکہ میں پولیس کی 2گاڑیوں پر ہونے والے اس حملے میں 12اہل کار شہید ہو گئے تھے۔