اسلام آباد(این این آئی)جمعیت علما اسلام (ف)کے رہنما حافظ حمد اللہ نے کہاہے کہ ہمیں اپوزیشن اتحاد میں شامل ہوکر نقصان ہوا،ملک میں سیاسی و معاشی استحکام کیلئے ایک ہی راستہ ہے کہ فوراً الیکشن کرایا جائے، اسٹبلشمنٹ آج بھی غیرسیاسی نہیں ہے، وزراء ایک کلرک ٹرانسفر کرنے کا اختیار نہیں رکھتے، مولانا فضل الرحمان کی لڑائی صرف اصولوں کی ہے۔نجی ٹی وی کے پروگرام میں گفتگوکرتے ہوئے حافظ حمداللہ نے کہا کہ ماضی میں ہم اتحاد کا حصہ رہے اس اتحاد کی وجہ سے ہمیں نقصان ہوا، فائدہ نہیں ہوا، لیکن ہم نے اس قوم کے مفاد کیلئے آئین کی بحالی کیلئے نقصان اٹھایا۔
انہوں نے کہاکہ ہماری اس تحریک کا بنیادی ہدف یہ ہے کہ ایک تو ہم اس سسٹم کے خلاف ہیں، ہم اسٹبلشمنٹ کی سیاست میں الیکشن میں مداخلت قطعاً قبول نہیں کرتے۔حافظ حمد اللہ نے کہاکہ ہم تحریک چلائیں گے، عوام اتنے باشعور ہوچکے ہیں کہ قوم کو اب اس حکومت اور اسٹبلشمنٹ پر اعتماد نہیں ہے۔انہوںنے کہاکہ یہاں الیکشن نہیں آکشن (نیلامی)ہوتا ہے، ملک میں سیاسی اور معاشی استحکام کیلئے ایک ہی راستہ ہے کہ فوراً اور صاف و شفاف الیکشن کرایا جائے۔انہوں نے واضح کیا کہ قطعاً ہم قومی حکومت کے حق میں نہیں ہیں۔
حافظ حمداللہ نے کہاکہ اسٹبلشمنٹ آج بھی غیرسیاسی نہیں ہے،آج بھی اس ملک میں میاں شہباز شریف کی حکومت نہیں ہے،آج بلوچستان میں جو لوگ حکومت میں بیٹھے ہیں ان کی حکومت نہیں ہے، وزراء خود تنہائی میں بیٹھ کر کہتے ہیں کہ ایک کلرک ٹرانسفر کرنے کا اختیار نہیں رکھتے۔انہوںنے کہاکہ مولانا فضل الرحمان کی آصف زرداری، نواز شریف یا شہباز شریف سے کوئی ذاتی لڑائی نہیں ہے، لڑائی صرف اصولوں کی ہے۔
