نیویارک (این این آئی)ڈبلیو ایچ او نے افریقہ میں منکی پاکس کی وبا کے بعد عالمی ہیلتھ ایمرجنسی کا اعلان کردیا۔سربراہ ڈبلیو ایچ او ٹیڈروس گیبرئیس نے کہا کانگو میں منکی پاکس کی متعدی وبا چار سو پچاس افراد کی جان لے چکی ہے، افریقہ کے باہر وائرس پھیلنے کا امکان بہت تشویشناک ہے۔
انہوں نے کہا کہ کانگو کے بعد وسطی اور مشرقی افریقہ کے کچھ حصوں میں وائرس پھیل چکا ہے، سال دو ہزار بائیس میں ایشیا سمیت سو ممالک میں کلیڈ ٹو وائرس پھیلا تھا۔سربراہ ڈبلیو ایچ او نے کہا کہ وائرس کی نئی قسم کلیڈ ون انتہائی خطرناک ہے، وبا کو روکنے کے لیے مربوط بین الاقوامی ردعمل ضروری ہے۔
