اسلام آباد(این این آئی)سابق وزیر خزانہ مفتاح اسماعیل نے بجلی کے بلوں میں کمی لانے کیلئے حکومت کو طریقہ بتادیا۔نجی ٹی وی کے پروگرام میں گفتگو کرتے ہوئے سابق وزیر خزانہ اور عوام پاکستان پارٹی کے رہنما مفتاح اسماعیل نے کہا کہ حکومت 185ارب پی ایس ڈی پی کم کرکے بجلی بل میں 20سے 25فیصد کمی لاسکتی ہے۔انہوں نے کہا کہ پی ایس ڈی پی کے پیسے 1150ارب کے بجائے 968ارب روپے کردیں۔سابق وزیر خزانہ نے کہاکہ حکومت بجلی کے بلوں سے ٹیکسز ختم کردیتی ہے تو 185ارب روپے کم ملیں گے، وزیراعظم ایک دستخط کردیں تو یہ مسئلہ حل ہوسکتا ہے۔

مفتاح اسماعیل نے کہا کہ وفاق پی ایس ڈی پی سے اخراجات کم کردے تو فرق نہیں پڑے گا بلکہ کرپشن کچھ کم ہوجائے گی،حکومت چاہے تو یہ دو دن میں کرسکتی ہے بس سوچ کا فقدان ہے۔ایک سوال کے جواب میں انہوں نے کہاکہ شاہد خاقان نے بطور وزیراعظم طے کردیا تھا کہ کوئی پلانٹ بغیر بڈنگ نہیں لگے گا، اس فیصلے کو بھی بانی پی ٹی آئی نے بطور وزیراعظم ختم کردیا تھا جو نہیں کرنا چاہئے تھا۔سابق وزیر خزانہ نے کہاکہ میں نہیں سمجھتا کہ میاں صاحب نے اس میں ایک پیسے کی بھی چوری کی ہو، پالیسی میں غلطیاں ہوئی ہوں گی مگر بدنیتی اس میں شامل نہیں تھی۔مفتاح اسماعیل نے کہا کہ امپورٹڈ کال پر بجلی پلانٹ نہیں چلانے تھے جو کہ جائز تنقید ہے، گرمیوں میں 32ہزار میگا واٹ بجلی بنا کر ڈسٹری بیوٹ کرسکتے ہیں۔انہوں نے کہاکہ کراچی کے قریب ونڈ پاور لگا ہے وہ فری میں بجلی دے رہا ہے مگر حکومت کے پاس ٹرانسمیشن لائن نہیں ہے۔