پشاور(این این آئی)بنوں امن مارچ کے شرکاء پر براہ راست فائرنگ کے خلاف سول سوسائٹی تنظیموں نے پشاور پریس کلب کے سامنے احتجاجی مظاہرہ کیا ،مظاہرین کی قیادت سول سوسائٹی تنظیموں کے نمائندوں تیمور کمال، حیات روغانے، شہکار محمد زئی اور امین اللہ کنڈی اطلس خان شیرانی کر رہے تھے ۔مظاہرین نے کہا کہ بنوں میں سکیورٹی اہلکاروں نے امن مارچ کے شرکاء پر فائرنگ کرکے ظلم اور بربریت کی انتہا کردی ہے فائرنگ کے نتیجے میں متعدد لوگ شہید اور زخمی ہوئے ہیں جس پر انسانی حقوق کی تنظیموں کو نوٹس لینا چاہئے ۔انہوں نے کہا کہ خیبر پختونخوا کے مختلف علاقوں میں امن و امان کی صورتحال خراب ہو رہی ہے جس پر اب لوگوں کی جانب سے احتجاج کی اجازت بھی نہیں دی جا رہی جو یقیناً تشویش ناک ہے اور اس عمل کا سخت عوامی ردعمل سامنے آئے گا۔
انہوںنے کہاکہ بنوں امن مارچ کے شرکاء پر براہ راست فائرنگ شرمناک ہے اور یہ اس بات کی ثبوت ہے کہ ریاست امن کی بجائے شدت پسندوں کے ساتھ کھڑی ہے۔ دنیا کے کسی بھی ملک میں ایسا عمل نہیں ہو رہا۔انہوں نے کہا کہ انسانی حقوق کی تنظیموں اور عدالت کو چاہیے کہ اس واقعے کی تحقیقات کیلئے خصوصی اقدامات کریں اور فائرنگ میں ملوث اہلکاروں کو قانون کے مطابق سزا دے۔
