مکوآنہ (این این آئی)فیصل آباد پولیس نے گھریلو ملازمہ مریدنی سے 4 ماہ تک زیادتی کرنیوالے نام نہاد جعلی پیر کو گرفتارکر کے قانونی کارروائی شروع کردی۔ تفصیلات کے مطابق فیصل آباد کی تحصیل چک جھمرہ کے علاقہ 188 رب نلے والا میں شکیل نامی نام نہاد پیر نے گھر کے کام کاج اور خدمت کیلئے بھجوائی گئی 16 سالہ مریدنی کو 4ماہ تک ہوس اور جنسی زیادتی کا نشانہ بنایا، لڑکی کو حبس بے جا میں قید رکھا گیا۔
اطلاع ملنے پر لڑکی بھاگ کر گھر آگئی، میڈیکل رپورٹ سے لڑکی کے حاملہ ہونے کا انکشاف ہوا ہے۔ والدین کی درخواست پر تھانہ جھمرہ پولیس نے جدید تکنیکی وسائل بروئے کار لاتے ہوئے ملزم کو فیصل آباد سے گرفتار کرلیا۔ پولیس حکام کے مطابق بچی کی ماں نے اپنی سولہ سالہ بیٹی کو خدمت کیلئے پیر کے گھر بھیجا تھا،جعلی پیر 4 ماہ تک بچی سے زیادتی کرتا رہا جس کی میڈیکل رپورٹ میں زیادتی اور حاملہ ہونا ثابت ہوا۔افسوسناک واقعہ رونما ہونے پر وزیراعلیٰ پنجاب مریم نواز شریف کی ہدایت پر چیئرپرسن پنجاب وومن پروٹیکشن حنا پرویز بٹ نے متاثرہ بچی سے ملاقات کیلئے وومن پولیس سٹیشن میں واقع جینڈر بیسڈ وائلنس یونٹ فیصل آباد کا دورہ کیا۔
ایس ایس پی انوسٹی گیشن رانا عبدالوہاب نے انہیں اس حوالے سے بریف کیا۔ چیئرپرسن پنجاب وومن پروٹیکشن حنا پرویز بٹ نے اپنے بیان میں کہا ہے کہ وزیراعلیٰ پنجاب مریم نواز شریف نے کلیئر کیا ہے کہ خواتین پر تشدد یا ریپ برداشت نہیں کیا جائے گا، خواتین کو تحفظ دینا ہماری اولین ترجیح ہے، خواتین پر تشدد اور ریپ کیس میں ملوث ملزمان سے زیرو ٹالیرنس پالیسی اپنائی جائیگی۔چیئرپرسن پنجاب وومن پروٹیکشن حنا پرویز بٹ نے متاثرہ بچی اور اسکی والدہ سے ہمدردی کا اظہار کیا۔
