کراچی(این این آئی) شارع فیصل پر واقع ایک دفتر میں سافٹ ویئر انجینئر نے کمپنی کے سی ای او کو قتل کردیا، واقعہ تنخواہ کی عدم ادائیگی کا شاخسانہ نکلا۔ تنخواہ کی عدم ادائیگی پر مشتعل سافٹ ویئر انجینئر نے کمپنی کے سی ای او کو موت کے گھاٹ اتار دیا۔ملزم واردات کے بعد آلہ قتل سمیت دفتر میں ہی موجود رہا جسے بعد ازاں پولیس نے گرفتار کرلیا، ملزم شعیب اور مقتول نوید خان دونوں اسی کمپنی میں سافٹ ویئر انجینئر تھے، مقتول سی ای او نوید6بھائیوں میں تیسرے نمبر پر اور3بچوں کا باپ تھا۔
اس حوالے سے پولیس حکام کا کہنا ہے کہ مقتول نوید خان غیر ملکی سافٹ وئیر کمپنی کے پاکستان آفس کا سی ای او تھا، ملزم شعیب کمپنی کا سابق ملازم تھا، ہیڈ آفس سے تاحال کسی ملازم کی تنخواہ نہیں آئی تھی۔پولیس کے مطابق شام کے وقت ملزم شعیب دفتر آیا اور سیدھا سی ای او نوید کے کمرے میں داخل ہوا، تلخ کلامی اور جھگڑے کے دوران ملزم نے تیز دھار آلے کے وار کرکے نوید کو شدید زخمی کردیا۔زخمی نوید اپنی جان بچانے کی خاطر دفتر سے باہر نکلا اور عمارت بیسمنٹ تک جاکر زمین پر گرگیا، زخمی سی ای او نوید کو مقامی اسپتال منتقل کیا گیا تاہم وہ زخموں کی تاب نہ لاتے ہوئے انتقال کرگیا۔
