کراچی (این این آئی)پاکستان تحریک انصاف کراچی ڈویژن کے صدر و سابقہ صوبائی اسمبلی سندھ راجہ اظہر خان پر توڑ پھوڑ اور ہنگامہ آرائی کے مقدمے میں فرد جرم عائد کردی گئی، صدر کراچی راجہ اظہر کے خلاف لانڈھی پولیس نے 2023 میں مقدمہ درج کیا تھا ، راجہ اظہر نے صحت جرم سے انکار کرتے ہوئے کہا ہے کہ مجھ پر جھوٹا مقدمہ بنایا گیا، جھوٹے گواہان پولیس کے اپنے بنائے ہوئے ہیں۔
یہ کچھ بھی کر لیں میں عمران خان کا ساتھ نہیں چھوڑنے والا۔ میں نے اپنے قائد عمران خان کے نظریے کے مطابق ہمیشہ آئین و قانون کی پاسداری کی ہے۔ہمیں درحقیقت آئین و قانون کی بالادستی کے مطالبے کی سزا دی جا رہی ہے۔ اللہ بہت بڑا اور اللہ حق پر ڈٹ جانے والوں کے ساتھ ہے۔ ہمارے قائد عمران خان اور ہم پر جتنے بھی جھوٹے مقدمات بنائے گئے ہیں وہ سب جلد ختم ہونگے۔اندھیری رات ختم ہو کر رہے گی، عدالت نے میرے جرم سے انکار پر 18 جولائی 2024 کے دن تمام جھوٹے گواہان کو طلب کرلیا ہے دیکھتے ہیں وہ گواہان کون ہیں۔
