لاہور( این این آئی) وزیر اعلیٰ پنجاب مریم نواز شریف نے 7لاکھ طلبہ کو عینک اور ہیرنگ ایڈ فراہم کرنے کے پراجیکٹ کی منظوری دیدی ۔ وزیراعلی پنجاب مریم نواز شریف سے معروف ادارے اے ٹی اسکیل کے وفد نے ملاقات کی ۔ سکولوں میں انٹرنیٹ سروسز او ردیگر امور پر تبادلہ خیال اور سکولوں کے بچوں میں غذائی ضروریات پوری کرنے کے لئے اقدامات پر غور کیا گیا ۔ہیلتھ نیو ٹریشن ا ور دیگر اقدامات کا جائزہ اورمتعلقہ ڈیپارٹمنٹ کے اشتراک کار کی ضرورت پر زور دیا گیا ۔اس موقع پر سکولوں کے اساتذہ کی استعداد کار میں اضافے کے لئے اقدامات پر بھی اتفاق کیا گیا۔

منصوبے کے تحت پنجاب کے سکولوں میں طلبہ کی سکریننگ کر کے نظر اور قوت سماعت چیک کی جائے گی ، کمزور قوت بصارت اور قوت سماعت والے طلبہ کو چشمے او رہیرنگ ایڈ دی جائیں گی ،پنجاب کے سرکاری اور نجی سکولو ں میں سکریننگ کا عمل جلد شروع کیاجائے گا ، معروف ادارہ اے ٹی اسکیل 500ملین کی مالی معاونت کرے گا ۔ وزیر اعلی مریم نواز شریف نے کہا کہ پنجاب میں آٹزیم کے شکار بچوں کے لئے پہلا سرکاری سکول لاہور میں قائم کیاجائے گا، عوام کی خدمت کے لئے روایتی طریقے سے ہٹ کر کام کرناچاہتی ہوں ،نئے دور میں نئی سوچ سے ہی مثبت تبدیلی ممکن ہے،عالمی معیار کے مطابق تعلیم حاصل کرنا ہر بچے کا حق ہے،طلبہ کی غذائی ضروریات پوری کرنے کے لئے نجی اشتراک سے پیکٹ ملک پراجیکٹ شرو ع کیا جارہا ہے۔

انہوں نے کہا کہ لاہور میں مفت ایمرجنسی وائی فائی کی سہولت دوبارہ شروع کر دی ہے۔ اے ٹی سکیل کے وفد نے کہا کہ وزیراعلی مریم نوازشریف کا عوامی خدمت کا ویژن قابل تعریف ہے۔ ملاقات میںسینیٹر پرویز رشید، سینئر منسٹر مریم اورنگزیب، صوبائی وزیر تعلیم رانا سکندر حیات، ایم پی اے نوشین عدنان اور دیگر بھی موجود تھے۔