کراچی(این این آئی) متحدہ قومی موومنٹ پاکستان نے پیپلزپارٹی سے 14 قائمہ کمیٹیوں کی چیئرمین شپ مانگ لی ہے۔پاکستان پیپلزپارٹی اور ایم کیوایم پاکستان کے درمیان قائمہ کمیٹیوں کی چیئرمین شپ کے حوالے سے پہلی باضابط ملاقات ہوئی ہے۔ذرائع کے مطابق ملاقات میں پیپلزپارٹی کے وفد میں اسپیکر سندھ اسمبلی قادر شاہ اوروزیرداخلہ سندھ ضیاء الحسن لنجار اور ایم کیوایم کے وفد میں اپوزیشن لیڈرعلی خورشیدی ، اراکین اسمبلی افتخار عالم اور جمال احمد شامل تھے۔ملاقات میں ایم کیوایم کی جانب سے قائمہ کمیٹیوں کے حوالے سے تجاویز دی گئیں اور سندھ اسمبلی میں قائمہ کمیٹیوں کے حوالے سے تفصیلی تبادلہ خیال کیاگیا۔

ذرائع نے بتایاکہ ایم کیوایم وفد نے 14 قائمہ کمٹیوں کی چیئرمین شپ کے حوالے سے پیپلزپارٹی کے وفد کو تجاویز دیتے ہو ئے کہا کہ ہماری ترجیحات میں جو کمیٹیاں شامل ہیں ان میں داخلہ، تعلیم ، بلدیات، صحت اور انڈسٹریزشامل ہیں۔ذرائع کے مطابق پیپلزپارٹی کے وفد نے ایم کیوایم قائمہ کمیٹیوں کے حوالے سے تجاویز مانگی تھیں جس پر ایم کیوایم کی جانب سے تجاویز فراہم کردی گئی ہیں۔پیپلزپارٹی کے وفدنے اس موقع پر کہاکہ لیڈر شپ سے مشاورت کے بعد جواب دیا جائے گا جبکہ ایم کیو ایم نے کہاکہ ایوان میں دوسری بڑی جماعت ایم کیو ایم ہے اس لیے 14 قائمہ کمیٹیوں کی چیئرمین شپ ان کو ملنی چاہیے۔