لاہور(این این آئی)مسلم لیگ (ن)کے قائد میاں محمد نواز شریف نے گندم اسکینڈل پر وزیراعظم شہباز شریف کو طلب کر لیا۔ذرائع کے مطابق قائد نوازشریف کی زیرصدارت جاتی امرا میں اجلاس ہوا جس میں (ن)لیگ کے قائد نے کہاکہ ملک میں گندم کا بحران پیدا کرنے والوں کو نہیں چھوڑا جائے گا۔ذرائع کے مطابق گندم اسکینڈل پر نوازشریف نے پیرکو وزیراعظم شہباز شریف کو طلب کرلیا اور اسی روز شہباز شریف کی جانب سے مسلم لیگ (ن)کے قائد کو رپورٹ پیش کرنے کا امکان ہے۔

جاتی امرا میں ہونے والے اجلاس میں نواز شریف کو بتایا گیاکہ بحری جہاز گندم لے کر چل پڑے اور منظوری بعد میں ہوئی ، 25دن میں پہنچنے والا جہاز منظوری کے 7روز بعد ہی بندرگاہ پر پہنچ گیا۔ذرائع کے مطابق اجلاس میں پنجاب میں کسانوں سے گندم خریدنے کے طریقہ کار کو بھی زیر بحث لایا گیا۔ذرائع کے مطابق نواز شریف نے کہاکہ کسان کارڈ فوری دئیے جائیں تاکہ کسانوں کو اگلی فصل میں آسانی ہو۔ذرائع کے مطابق فیکٹ فائنڈنگ کی رپورٹ آنے پر پنجاب میں گندم خریدنے کے لائحہ عمل کا اعلان کیا جائے گا،کسانوں کو 5سو ارب کے کسان کارڈ دئیے جائیں گے۔