اسلام آباد (این این آئی)لانگ مارچ توڑ پھوڑ کیس میں بانی پی ٹی آئی بری ہوگئے، بانی تحریک انصاف کے خلاف دو تھانوں میں مقدمات درج تھے،اسلام آباد کی مقامی عدالت نے محفوظ فیصلہ سنا دیا ۔ منگل کو اسلام آباد کی مقامی عدالت نے بانی پی ٹی آئی کو لانگ مارچ میں ہنگامہ آرائی اور املاک کو نقصان پہنچانے کے دو مقدمات میں بری کردیا ۔عدالت میں بانی پی ٹی آئی کے وکلاء نعیم پنجوتھا نے استدعا کی کہ بانی پی ٹی آئی کو عدالت طلب کیا جائے، جس پرجوڈیشل مجسٹریٹ شائستہ کنڈی نے ریمارکس دئیے کہ پہلے بانی پی ٹی آئی کی درخواست بریت پر بحث کر لیں اگر بانی پی ٹی آئی کو عدالت لاتے ہوئے راستے میں کچھ ہوگیا تو کون ذمہ دار ہوگا؟
وکیل نعیم پنجوتھا نے کہا کہ حکومت کا کام سیکیورٹی مہیا کرنا ہے وہ بانی پی ٹی آئی کی موجودگی میں دلائل دینا چاہتے ہیں جس پر جج شائستہ کنڈی نے ریمارکس دئیے کہ ضمانت پر حاضری ضروری ہوتی، درخواست پروڈکشن پر نہیں عدالت نے بانی پی ٹی آئی کی درخواست پروڈکشن مسترد کردی۔ بریت پر دلائل دیتے ہوئے نعیم پنجوتھا نے موقف اپنایا کہ بانی پی ٹی آئی پر تمام مقدمات میں صرف اکسانے کا کرادر ہے ایک ہی دن میں متعدد مقدمات درج ہوئے دو برسوں میں کسی گواہ نے گواہی دی نہ شواہد موجود ہیں دلائل کے بعد عدالت نے فیصلہ محفوظ کر لیا جسے کچھ دیر بعد سناتے ہوئے بانی پی ٹی آئی کو دو مقدمات میں بری کر دیا بانی پی ٹی آئی کے خلاف تھانہ سہالہ، لوہی بھیر میں مقدمات درج تھے۔
