کراچی(این این آئی)پولیس نے کراچی سے لاپتہ ہونے والی 5 لڑکیاں تلاش کر لیں، 15 فروری کو پانچوں لڑکیاں ایک ساتھ گھروں سے بھاگی تھیں۔تفصیلات کے مطابق کراچی میں سعید آباد پولیس نے ناظم آباد کھنڈوگوٹھ میں کارروائی کرتے ہوئے لاپتہ 5 لڑکیاں تلاش کرلیں ، لڑکیوں میں 3 بہنیں آسیہ، مریم ،خدیجہ اور 2بہنیں صغری اور کبری شامل ہیں۔

ایس ایس پی کیماڑی عارف اسلم رائو نے بتایا کہ پانچوں لڑکیوں کی عمریں14سے19سال کے درمیان ہیں، ابتدائی تفتیش کے دوران واقعہ اغواکا نہیں بلکہ گھریلوتشدد کا نکلا۔عارف اسلم رائو نے بتایاکہ 15 فروری کو پانچوں لڑکیاں ایک ساتھ گھروں سے بھاگی تھیں، لڑکیوں نے جبری شادی کی کوشش اور مارپیٹ پر انتہائی قدم اٹھایا۔انھوں نے مزید بتایا کہ لڑکیاں گھر سے بھاگنے کے بعد پہلے سی ویو پر پہنچی تھیں،ایک رات سی ویو پر گزارنے کے بعد ناظم آباد کھنڈو گوٹھ گئیں، فیکٹریوں میں کام کی تلاش میں گئیں تو ممتاز نامی ٹھیکیدار ملا۔

ایس ایس پی کیماڑی نے کہا کہ ٹھیکیدار کو بتایاکہ یتیم ہیں کام چاہیے جس پر نوکری لی ، پانچوں لڑکیوں کو 3گارمنٹ فیکٹریوں میں کام ملا تھا، جس کے بعد لڑکیوں نے فیکٹری ایریا میں ہی 15 ہزارمیں مکان کرایے پر لیا۔عارف اسلم رائونے کہاکہ پولیس کے لیے یہ کیس ہائی پروفائل اور چیلنج تھا، کیس حل کرنے میں 32 روز کا وقت لگا، پانچوں لڑکیوں کے مزید بیانات لیے جارہے ہیں۔