اسلام آباد (این این آئی)چیئرمین پی ٹی آئی بیرسٹر گوہر نے کہا ہے کہ سنی اتحاد کونسل سے اتحاد درست فیصلہ تھا اور ہم فیصلے پر قائم ہیں،ہمیں لیول پلینگ فیلڈ نہ دینے کی ذمے داری الیکشن کمیشن پرعائد ہوتی ہے۔تفصیلات کے مطابق میڈیا سے گفتگو کرتے ہوئے چیئرمین پی ٹی آئی گوہر علی خان نے کہا کہ سنی اتحاد کونسل سے اتحاد درست فیصلہ تھا اور ہم فیصلے پر قائم ہیں،اپنی اپنی رائے میں اختلاف ہوجاتا ہے، کچھ لوگ فیصلہ سازی میں ساتھ نہیں تھے نہ ہی وہ پس منظرجانتے تھے۔

انہوں نے کہا کہ شیر افضل مروت ہمارے ایم این اے ہیں، اگر وہ کہتے ہیں غلطی ہوئی تو یہ ان کی رائے ہے ۔انہوں نے کہا کہ ہماری کور کمیٹی 3مرتبہ ملتی ہے ، یہ نہ تو( ن) لیگ میں ہے ،نہ ہی پیپلزپارٹی میں ہے۔انہوں نے کہا کہ علی امین گنڈا پور کی اچھائی ہے کہ وہ اپنی عوام کیلئے وزیر اعظم کے پاس آیا، وزیر اعلی کے پی کا وزیراعظم کے ساتھ بیٹھنا ضروری تھا۔انہوں نے کہا کہ بلے کا انتخابی نشان ہماری وجہ سے نہیں گیا، ساری دنیا جانتی ہے جو ہمارے ساتھ ہوتے تھے انہیں کیسے اٹھالیا جاتا تھا، الیکشن کمیشن نے شفاف انتخابات کا حلف اٹھایا ، ان کو حالات کا ذمے دار ٹھہراتا ہوں، ہمیں لیول پلینگ فیلڈ نہ دینے کی ذمے داری الیکشن کمیشن پرعائد ہوتی ہے، الیکشن کمیشن کو پوچھنے والا ادارہ پارلیمان ہے۔انہوں نے کہا کہ اسلام آباد میں پرامن جلسہ کریں گے ،ہم بائیکاٹ کریں گے نہ ہی استعفے دیں گے ، بلکہ بھرپور پارلیمانی سیاست کریں گے۔