راولپنڈی(این این آئی)الخدمت فاؤنڈیشن پاکستان نے غزہ جنگ سے متاثرہ 15ہزا ر خاندانوں کے لیے رمضان فوڈ پیکج اور جدید ایمبولینس غزہ روانہ کردی۔ مرکزی صدڈاکٹرحفیظ الرحمن نے اسماعلیہ مصرسے رفح بارڈ رکے ذریعے امدادی سامان روانہ کرتے ہوئے بتایا کہ الخدمت کی اس کھیپ میں 20 بڑے ٹریلرز کے ذرریعے 400ٹن امدادی سامان غزہ بھجوایاگیا ہے ۔ جس کے ساتھ زخمیوں ومریضوں کیلئے جدید ساز و سامان سے لیس ایمبولنس بھی روانہ کی گئی ہے۔ ڈاکٹر حفیظ الرحمن نے کہا کہ غزہ جنگ سے متاثرہ 22 لاکھ افراد پوری دنیا خاص طور پر مسلمانوں کے لیے امتحان ہے۔ جنگ سے متاثرہ بہن بھائیوں کو ریلیف فراہم کرنے کیلئے الخدمت کی پوری ٹیم اور رضاکارمصروف عمل ہیں ، الخدمت فاؤنڈیشن اب تک غزہ متاثرین کیلئے ایک ارب 70کروڑروپے کی امدادی سرگرمیاں سر انجام دے چکی ہے۔

غزہ کے اندر موجود ترک اور فلسطینی اداروں کے تعاون کے ساتھ ساتھ امدادی سرگرمیوں کو تیز اور موثر بنانے کے لیے الخدمت نے قاہرہ میں کیمپ آفس اور وئیر ہاؤس قائم کیا ہے ، جہاں سے مسلسل امدادی سامان غزہ بھجوایا جا رہا ہے۔ پاکستان سے امدادی سامان بھجوانے کے لیے الخدمت فاؤنڈیشن نے این ڈی ایم اے کی مدد سے ائیر کارگو اور سمندر کے رستے امدادی سامان بھجوانے کا سلسلہ شروع کیا، اب تک 5 ائیر کارگو العریش، 1 اردن اور بحری جہاز کے ذریعے ادویات، تیار کھانا، خیمے، ترپال، بے بی کٹس، ہائی جین کٹس اور ونٹر پیکج بھجوا ئے جاچکے ہیں۔انھوں نے کہاکہ الخدمت کی جانب سے غزہ کے زخمیوں اور مریضوں کے لیے مختلف مراحل میں 250 ٹن ادویات بھیجی گئیںجبکہ غزہ میں میڈیکل ایمرجنسی کے پیش نظر الخدمت فاؤنڈیشن نے فیلڈ ہسپتال کی ورکنگ مکمل کر لی ہے اجازت ملنے پر الخدمت اور پیما کے ڈاکٹرز غزہ روانہ ہوں گے۔