اسلام آباد(مانیٹرنگ ڈیسک) مرحوم سینئر صحافی ارشد شریف کی والدہ نے چیئرمین پی ٹی آئی کو اپنے بیٹے کے قتل از خود نوٹس کیس میں شامل تفتیش کرنے کی درخواست دائر کردی ہے۔ یہ درخواست ایڈووکیٹ شوکت عزیز صدیقی کی وساطت سے دائر کی گئی ہے، اس درخواست میں ارشد شریف کی والدہ نے مؤقف اختیار کیا ہے کہ چیئرمین پی ٹی آئی، فیصل واوڈا، سلمان اقبال، مراد سعید اور عمران ریاض کو شامل تفتیش کیا جائے۔
درخواست میں عدالت سے استدعا کی گئی کہ ارشد شریف کے قتل سے متعلق ان تمام افراد سے شواہد حاصل کئے جائیں۔ ارشد شریف کی والدہ نے کہا کہ قتل کی تحقیقات پاکستان میں ہونے والی سازش سے شروع کی جائیں۔ کئی افراد نے ارشد شریف کے قتل کی سازش کے بارے میں جاننے کا دعویٰ کیا ہے۔ ارشد شریف کی والدہ کا کہنا ہے کہ فیکٹ فائنڈنگ کمیٹی کی رپورٹ اور نہ ہی جے آئی ٹی کی رپورٹ فراہم کی گئی ہے۔ انہوں نے اعلیٰ عدالت سے استدعا کی کہ جے آئی ٹی سربراہ کو پانچ افراد کو تحقیقات میں شامل کرنے کا حکم دے۔ ساتھ ہی سپریم کورٹ جے آئی ٹی کی رپورٹس فراہم کرنے کا حکم بھی دے۔
