نارووال (این این آئی)سرکلر روڈ پر فاسٹ فوڈ ریسٹورنٹ میں مبینہ طور پر سلنڈر پھٹنے سے آگ بھڑک اٹھی،چار افراد زندہ جل گئے۔بتایا گیا ہے کہ نارووال سر کل کر روڈ پر واقع نجی فاسٹ فوڈ ریسٹورنٹ کرنچ بائٹ میں دوپہر کے وقت مبینہ طور پر گیس لیکج کی وجہ سے سلنڈر پھٹ گیا جس نے دیکھتے ہی دیکھتے پورے ریسٹورنٹ کو اپنی لپیٹ میں لے لیا اور دھویں کے بادل آسمان سے باتیں کرنے لگے،

آگ اتنی شدید تھی کہ ریسٹورنٹ میں موجود افراد کو باہر نکلنے کا موقع نہ مل سکا کئی افراد نے چھتوں سے چھلامیں لگا کر اپنی جانیں بچائی۔اطلاع ملتے ہی،عوام، ریسکیو 1122،پولیس اور انتظامی افسران موقع پر پہنچ گئے اور آگ بجھانے اور ریسٹورنٹ میں پھسے افراد کو ریسکیو کرنے کے لیے امدادی کاروائیاں شروع کی گییں۔آگ لگنے کی خبر شہر میں جنگل کی آگ کی طرح پھیل کئی اور ہر طرف چیخ و پکار تھی۔

عوام کی کثیر تعداد جائے حادثہ پر اکھٹی ہو گئی جس سے امدادی کارروائیوں میں مشکلات کا سامنا کرنا پڑا،،ریسکیو 1122نے دو گھنٹے آپریشن کے بعد آگ پر قابو پا لیا اور کولنگ کا عمل شروع کر دیا۔جس کے بعد ریسٹورنٹ سے دو خواتین سمیت چار افراد کی لاشیں باہر نکالی گئیں جن میں دو کی شناخت نہیں ہو سکی،آگ سے جھلس کر جاں بحق ہونے والوں میں،فوزیہ نسیم زوجہ عبد الرحمن،محمد وسیم سکنہ چونڈہ شامل ہیں جبکہ دو لاشوں کی ابھی تک شناخت نہیں ہو سکی تین افراد زخمی ہوئے جن میں عبد الرحمن اور دیگر شامل ہیں۔ریسکیو 1122نے زخمی اور لاشوں کو ڈسٹرکٹ ہیڈ کوارٹر ہسپتال نارووال منثقل کر دیا۔اگ کی وجہ سے ریسٹورنٹ جل کر خاکستر ہو گیا شہر کی فضا سوگوار رہی۔