اسلام آباد(آن لائن ) مشیر خزانہ حفیظ شیخ کا جوڑ توڑ کے ماہر پی ٹی آئی رہنما جہانگیر ترین سے ٹیلی فونک رابطہ ہوا جس میں انہو ں نے جہانگیر ترین سے سینیٹ الیکشن میں کامیابی کے لیے حمایت مانگی۔تفصیلات کے مطابق وزیراعظم عمران خان کے قریبی دوست جہا نگیر ترین

اور حفیظ شیخ کے درمیان ٹیلی فونک رابطہ ہوا ہے جس میں جہا نگیر ترین نے سینیٹ الیکشن میں مکمل تعاون کی یقین دہانی کروائی، جہانگیر ترین نے یقین دہانی کروائی کہ آپ میرے دوست ہیں، آپ کے ساتھ مکمل تعاون کروں گا۔آپ ہماری پارٹی کے امیدوار ہیں آپ کو لازمی سپورٹ کریں گے، جہا نگیر ترین نے حفیظ شیخ سے رابطے کے بعد جنوبی پنجاب کے ناراض حکومتی ایم این ایز سے بھی رابطے شروع کر دیے ہیں اور انہیں حفیظ شیخ کو مکمل سپورٹ کرنے کی دراخوست کی ہے جبکہ ان کے تحفظات بھی دور کرنے کی یقین دہا نی کروائی ہے ۔ واضح رہے کہ سینیٹ الیکشن میں اسلام آباد سے حفیظ شیخ اور سابق وزیر اعظم یوسف رضا گیلانی آمنے سامنے ہیں۔دوسری جانب مرکزی نائب صدر پی ٹی آئی زاہد حسین کاظمی نے کہا ہے کہ پی ٹی آئی کا مرکزی سیکرٹریٹ 25 فروری کو جی ایٹ فور میں منتقل کر دیا جائے گا۔ اپنے ایک بیان میں انہوں نے کہا پارٹی کے نئے مرکزی سیکرٹریٹ کا کام مکمل ہونے پر وزیراعظم پاکستان و چئیرمین تحریک انصاف عمران خان کو افتتاحی تقریب میں دعوت دی جائے گی۔ انہوں نے کہا 25 فروری سے میڈیا، فنانس اور ایڈمنسٹریشن ڈیپارٹمنٹ کا سٹاف نئی بلڈنگ میں اپنی ذمہ داریاں سرانجام دینا شروع کر دے گا۔