اسلام آباد (مانیٹرنگ + این این آئی) سابق وزیراعظم میاں نواز شریف کے بارے میں کئی روز سے خبریں چل رہی ہیں کہ وہ سعودی عرب جا رہے ہیں، اس حوالے سے موقر قومی اخبار نے اپنی رپورٹ میں کہا ہے کہ میاں نواز شریف گزشتہ ایک سال سے لندن میں قیام پذیر ہیں مگر کچھ روز بعدوہ چند دن کے لئے سعودی عرب کے دورے
پر جارہے ہیں۔نواز شریف کے قریبی ذرائع کا حوالہ دیتے ہوئے اخبار نے لکھا کہ وہ سعودی عرب میں دو سے تین ہفتے تک قیام کر سکتے ہیں اورسعودی عرب سے پھر وہ لندن واپس جائیں گے، سعودی عرب میں قیام کے دوران وہ عمرہ بھی کریں گے، اخبار نے دعویٰ کیا ہے کہ سابق وزیراعظم کا اس دورے کے دوران طاقتور شخصیات سے ملاقاتوں کا بھی امکان ہے۔ دوسری جانب پاکستان مسلم لیگ (ن) کی نائب صدر مریم نواز نے کہا ہے کہ براڈ شیٹ کیس حکومت کے منہ پر زور دار طمانچہ ہے، حکمرانوں نے قومی خزانہ برباد کردیا لیکن کچھ نہیں نکلا، نااہل،کرپٹ اورچوروں نے براڈ شیٹ سے بھی کمیشن مانگا،نواز شریف سر خرو ہوئے ہیں،19جنوری کو الیکشن کمیشن کے سامنے بھرپور احتجاج کیاجائیگا، حکمرانوں کے بیانات صرف خودکو طفل تسلیاں دینے کیلئے ہیں حقیقت میں ان کے ہاتھ پاؤں اور سانسیں پھولی ہوئی ہیں۔شہباز شریف اور حمزہ شہباز سے احتساب عدالت میں ملاقات کیلئے آمد کے موقع پر گفتگو کرتے ہوئے مریم نواز نے کہا کہ حکومت جتنا جھوٹ بولتی ہے اتنی ہی بے نقاب ہوتی ہے، عوام اب عمران خان سے تنگ آ چکے ہیں، عمران خان وزیر اعظم نہیں اناڑی کھلاڑی ہے۔ انہوں نے کہا کہ ابھی ایک مشیر کا استعفیٰ آیا ہے بہت سے استعفے آنا باقی ہیں، سلیکٹڈ وزیر اعظم کے مشیروں اور
وزیروں کو معاملات بارے پتہ چلنا شروع ہوگیاہے۔انہوں نے کہا کہ پی ڈی ایم الیکشن کمیشن کے سامنے بھر پوراحتجاج کرے گی،انشااللہ ضمنی انتخابات میں جیت مسلم لیگ(ن) کی ہی ہوگی۔ پی ڈی ایم کی تحریک میں عوام شامل ہیں، ہم وہ کرنے جائیں گے جس سے یہ حکومت ٹھہر نہیں سکے گی۔
