لاہور (این این آئی) لاہور شہر کی صفائی کے حوالے سے لاہور ویسٹ مینجمنٹ کمپنی کے دعوے دھرے کے دھرے رہ گئے، شہریوں نے ڈیڈ لائن ختم ہونے کے بعد ڈھول بجا کر انوکھا احتجاج کیا ۔تفصیلات کے مطابق لاہور میں صفائی کمپنی کی جانب سے دی گئی ڈیڈ لائن گزر گئی۔

اب بھی شہر میں جا بجا گندگی کے ڈھیر اور کوڑا کرکٹ نظر آ رہا ہے، جوہر ٹائون، شادمان، اقبال ٹائون، گلبرگ سمیت کئی علاقوں میں اب بھی کوڑے کے کنٹینرز بھرے پڑے ہیں اور شہری کوڑا کرکٹ سے اٹھتے تعفن کے باعث سخت مشکل سے دوچار ہیں۔لاہور زیرو ویسٹ کرنے کا آخری روز بھی صفائی مشینری متحرک رہی مگر اس کے باوجود بیشتر علاقوں میں تاحال کوڑا موجود رہا، شہر کے کئی علاقے جن میں سوامی نگر شامل ہے سے 10 روز سے کوئی کوڑا اٹھانے نہیں آیا، گھوڑے شاہ قبرستان سے ملحقہ سڑکوں پر بھی گندگی کی بھرمار ہے۔دوسری جانب شہریوں نے کچرا صاف نہ کرنے پر شہریوں کا ڈھول بجا کر انوکھا احتجاج کیا اور صوبائی حکومت صفائی سے شہر میں مکمل طور پر صفائی کا مطالبہ کیا، احتجاج کے دوران ایک شہری کچرے میں جا کھڑا ہوا اور کچرے میں کھڑا ہوکر ڈانس بھی کیا۔دوسری جانب صوبائی وزیر صنعت و تجارت میاں اسلم اقبال نے مشن کلین لاہور کے سلسلے میں لاہور ویسٹ مینجمنٹ کمپنی

کے فیلڈ ملازمین کی اتوار کی چھٹی منسوخ کر دی جس کا نوٹیفکیشن جاری کر دیا گیا۔نوٹیفکیشن کا اطلاق تمام ورک چارج ملازمین، کنٹریکٹ ملازمین پر ہوگا، ملازمین کو چھٹی کے متبادل میں رولز کے مطابق معاوضہ دیا جائے گا۔ میاں اسلم اقبال نے کہا ہے کہ اتوار والے دن بھی

لاہور ویسٹ مینجمنٹ کمپنی کے فیلڈ ملازمین ڈیوٹی پر ہوں گے، لاہور کو خوبصورت بنانے کے مشن پر گامزن ہیں، زیرو ویسٹ کا ہدف حاصل کرنے کے بعد بھی صفائی کے حوالے سے اہم اقدامات جاری رہیں گے، لاہور کی شاہراہوں کو خوبصورت بنانے کے حوالے سے بھی ترقیاتی محکموں کو اہداف دے دیئے ہیں۔

موضوعات:لاہور ویسٹ مینجمنٹ کمپنی