اسلام آباد(آن لائن)تھانہ کورال کی حدود میں پولیس وردی میں ملبوس 4افراد نے  چادر و چار دیواری کا تقدس پامال کرتے ہوئے شہری کے گھر میں گھس کر میاں بیوی کو زدوکوب کرتے ہوئے ہتھکڑیاں لگا کر 50ہزار روپے نقدی چھین لی  اور دھمکی دی کہ اگر اس حوالے سے کسی قسم کی بھی شکایت کی تو سنگین مقدمات میں پھنسا دیں گے۔شہری نے تھانہ کورال میں ملزمان کے

خلاف مقدمے کے اندراج کیلئے درخواست دے دی۔تفصیلات کے مطابق تھانہ کورال میں نذیر احمد ولد محمد صدیق سکنہ چک نمبر205کے رہائشی نے مقدمے کے اندراج کیلئے درخواست دائر کی جس میں کہا گیا کہ میں اسلام آباد کا رہائشی ہوں اور محنت مزدوری کرکے اپنے بچوں کا پیٹ پال رہا ہوں۔گزشتہ رات9بجے میں اپنے گھر صنم ٹاؤن میں موجود تھا کہ4 افراد دروازہ توڑ کر گھر میں گھس آئے اور آتے ہی مجھے مارنا پیٹنا شروع کردیا اور کہا کہ میرا نام ندیم ہے اور میں راولپنڈی پولیس میں اے ایس آئی ہوں اور میرے ساتھ تھانہ کورال پولیس بھی موجود ہے۔درخواست کے مطابق ان چار افراد میں سے 2افراد باوردی تھے جو اسلام آباد پولیس کے ملازم تھے،جن میں ایک کانام باسط بٹ حوالدار تھا اور دوسرا داڑھی والا کانسٹیبل تھا۔انہوں نے مجھے اور میری بیوی کو ہتھکڑیاں لگا کر کھنہ پل کے قریب لے گئے اور 50ہزار روپے نقدی چھین کر ہمیں چھوڑ دیا اور جاتے ہوئے دھمکی دی کہ اگر کسی سے شکایت کی تو تمہیں سنگین مقدمات میں پھنسا کر تمہارے خلاف 9Cکا پرچہ کروا دیں گے۔درخواست گزار نے استدعا کی کہ میرے ساتھ زیادتی ہوئی ہے اور اپیل کی ہے کہ ان تمام ملزمان کے خلاف قانونی کارروائی عمل میں لائی جائے۔