اسلام آباد(آن لائن) چیئرمین پی ٹی وی بورڈ آف ڈائریکٹرز نعیم بخاری اور ایم ڈی عامر منظور میں ٹھن گئی۔ چیرمین پی ٹی وی نے اختیارات کا ناجائز استعمال کرتے ہوئے پی ٹی وی کو خسارے سے نکالنے والے 8افسران کاکنٹریکٹ منسوخ کروادیا اور تمام ذمہ داری

وفاقی وزیر برائے اطلاعات و نشریات سینیٹر شبلی فراز اور سیکرٹری اطلاعات زاہدہ پروین پر ڈال دی۔ذرائع کے مطابق چیرمین پی ٹی وی بورڈ کے پاس کسی قسم کے کوئی انتظامی اختیارات نہیں ہوتے مگر نعیم بخاری نے آتے ہی ایم ڈی پی ٹی وی کے اختیارات میں مداخلت شروع کردی ہے جس پر دونوں میں ٹھن گئی ہے اور جن افسرا ن کو نکالنے کا حکمنامہ جاری کیا گیا ہے اس حوالے سے ایم ڈی پی ٹی وی کو شدید تحفظات ہیں۔جن افسران کا کنٹریکٹ منسوخ کرنے کا آرڈر جاری ہوا ہے ان میں چیف آف مارکیٹنگ سٹرٹیجی خاور اظہر،گیسٹ برانڈ ایمبیسڈر راشد لطیف، چیف ہیومن ریسورس آفیسر محمد طاہر مشتاق، چیف نیوز اینڈ کرنٹ آفئیرز قطرینہ حسین، چیف ٹیکنالوجی آفیسر ناصر اے نقوی،ایگزیکٹو پروڈیوسر کرنٹ آفئیرز خرم منظور،ہیڈ آف سٹرٹیجی اینڈ کارپوریٹ کمیونیکشن عاصم بیگ اور جی ایم سیکورٹی کرنل (ر) محمد عظیم نیازی شامل ہیں۔ یہ موقف اختیار کیا گیا کہ چونکہ پی ٹی وی مالیاتی خسارے کا شکار ہے اور پہلے ہی 3560ریگولر ملازمین ہیں اس لئے بھاری تنخواہوں پر رکھے گئے کنٹریکٹ ملازمین کی تعداد کم کی جاری ہے۔

موضوعات:نعیم بخاری