ملتان (نیوز ڈیسک+ آن لائن) پاکستان پیپلز پارٹی کے شریک چیئرمین کورونا میں مبتلا ہیں اور انہوں نے اس کے باوجود ویڈیو لنک کے ذریعے خطاب کرنے کا فیصلہ کیا ہے لیکن اس کے برعکس آصفہ بھٹو کو بھی پیپلزپارٹی سیاسی میدان میں اتار رہی ہے، ملتان کے جلسے میں آصفہ بھٹو
کو لانچ کرنے کا اعلان کیا گیا ہے، اس حوالے سے معروف صحافی رانا عظیم کا کہنا ہے کہ آصفہ بھٹو کو مریم نواز کے مقابلے میں سامنے لایا گیا ہے، سینئر صحافی کے مطابق پیپلز پارٹی جلسوں میں ن لیگ کی مرکزی نائب صدر مریم نواز کی مقبولیت سے خاصی خائف تھی جس کے بعد پیپلز پارٹی نے بھی آصفہ بھٹو کو خاتون رہنما کے طور پرسیاسی میدان میں لانے کا فیصلہ کیا ہے۔ان کے مطابق گزشتہ کافی عرصہ سے آصفہ بھٹو کی سیاسی تربیت بھی کی جا رہی تھی، پیپلز پارٹی کا کہنا ہے کہ آصفہ بھٹو میں محترمہ بے نظیر بھٹو شہید کی جھلک نظر آتی ہے۔انہوں نے کہا کہ پیپلز پارٹی کا آصفہ بھٹو کو جنوبی پنجاب میں لانچ کرنے کااچھا فیصلہ ہے۔ دوسری جانب سابق وزیراعظم پاکستان پیپلز پارٹی کے رہنما یوسف رضا گیلانی نے کہا ہے کہ بلاول بھٹو زرداری کورونا کے باعث قرنطینہ میں ہیں۔ آصفہ بھٹو ان کی نمائندگی کریں گے۔ مریم نواز شریف کی نمائندگی کریں گی۔ نجی ٹی وی سے گفتگو میں انہوں نے کہا ہے کہ ملتان کا جلسہ تاریخ ساز ہوگا۔ حکومت نے جس طرح جھوٹی ایف آئی آر اور گرفتاریوں کا سلسلہ شروع کیا ہے یہ حکمرانوں کی بدحواسی کا عالم ہے۔ انہوں نے کہا کہ ملتان جلسہ پاکستان کی ایک نئی تاریخ رقم کرے گا۔ انہوں نے کہا کہ جلسہ منسوخ نہیں ہوگا۔حکمران کورونا کا ڈرامہ رچا کر اپوزیشن کے جلسے بند کرنا چاہتے ہیں۔
