لاہور(این این آئی) وزیراعلیٰ پنجاب سردارعثمان بزدار نے کہا ہے کہ پنجاب میں گزشتہ24گھنٹے میں کورونا کے 77نئے کیس سامنے آئے ہیں اور24گھنٹے میں کوروناکا1مریض جاں بحق ہوا۔ پنجاب میں صحت یاب مریضوں کی تعداد 96945ہے اور کورونا کے ایکٹو کیسوں کی
تعداد1561ہے۔انہوں نے کہا کہ24گھنٹے میں 11082 ٹیسٹ کیے گئے ہیں اورمجموعی طورپراب تک1374480ٹیسٹ کیے جاچکے ہیں۔پنجاب میں تشویشناک مریضوں کی تعداد 21ہے اوراب تک 2258مریض کورونا کے باعث جاں بحق ہوچکے ہیں۔انہوں نے کہا کہ ستمبر کے مقابلے میں اکتوبر کے 12دنوں میں مریضوں کی تعداد میں معمولی اضافہ دیکھنے میں آیا ہے۔ کورونا کا پھیلاؤ روکنے کیلئے شہریوں کا پہلے کی طرح بھر پور تعاون ضروری ہے۔انسداد کورونا ایس او پیز پر عمل شہریوں کو کورونا سے محفوظ رکھے گا۔انہوں نے کہا کہ ایس او پیز پر عملدرآمد نہ کرنے پر بزنس مقامات اورتعلیمی اداروں کے خلاف قانون کے تحت کارروائیاں ہورہی ہیں۔اب تک 20تعلیمی اداروں اور11بزنس مقامات کو بند کیاگیا ہے۔شہریوں سے اپیل ہے کہ وہ پرہجوم مقامات پر جانے سے گریز کریں۔ماسک پہننے کی پابندی پر عمل کیا جائے اورسماجی فاصلے برقراررکھے جائیں۔
