لاہور( این این آئی)قومی احتساب بیورو ( نیب ) لاہور میں آج پیر پانچ پیشیاں ہوں گی ،شراب لائسنس کیس میں وزیر اعلیٰ پنجاب کے سابق پرنسپل سیکرٹری ڈاکٹر راحیل صدیقی کی تیسری پیشی ہو گی ، کچی آبادی الاٹمنٹ کیس میں مسلم لیگ (ن ) کے سابق رکن پنجاب اسمبلی ماجد ظہور اور سابق کونسلر امیر محمد گجر کو بھی آج ( پیر ) کے لئے کال اپ نوٹس وصول کرا دیا گیا۔
تفصیلات کے مطابق قومی احتساب بیورو لاہور کی جانب سے مسلم لیگ (ن) کے مرکزی رہنما حنیف عباسی کو سپورٹس بورڈ پنجاب کرپشن کیس میں طلب کیا گیا ہے ۔نیب کی جانب سے لیگی رہنما کو 20سوالوں پر مشتمل سوالنامہ بھی ارسال کیا گیاہے اور انہیںتمام سوالات کے جوابات کے ہمراہ پیش ہونے کی ہدایت کی گئی ہے ۔تحریک انصاف کے رکن پنجاب اسمبلی غضنفر عباس چھینہ کو بھی آج پیر کے روز پیشی کا نوٹس دیا گیا ہے ۔تحریک انصاف کے رکن اسمبلی کو بھکر میں غیر قانونی الاٹمنٹ کیس میں طلب کیا گیا ہے۔ مسلم لیگ (ن) کے رہنما مریم نواز کے ماموںزاد میاںمحسن لطیف کو اوقاف کی زمین دینے کے کیس میں آج پیر کے روز نیب میں پیش ہونے کی ہدایت کی گئی ہے ۔سابق وزیر اعلی پنجاب ، ایل ڈی اے اور اوقاف کے افسران بھی اس انکوائری میں شامل ہیں۔نیب نے وزیر اعلیٰ پنجاب کے سابق پرنسپل سیکرٹری ڈاکٹر راحیل احمد صدیقی کو بھی آج 17 اگست کو تیسری بار طلب کر رکھا ہے۔ انہیںنیب کی جانب سے دیا گیا سوالنامے کے جوابات جمع کرانے کی ہدایت کی گئی ہے۔نیب وزیراعلی پنجاب کے خلاف نجی ہوٹل کو خلاف ضابطہ شراب کے لائسنس کے اجرا ء کے حوالے سے تحقیقات کر رہاہے ۔علاوہ ازیں نیب نے مسلم لیگ (ن) کے سابق رکن پنجاب اسمبلی ماجد ظہور اور سابق کونسلر امیر محمد گجر کو شاہ شمس کالونی جی او آر ون کچی آبادی کی غیر قانونی الاٹمنٹ کیں میں آج ( پیر) کے روز پیش ہونے کے لئے کال اپ نوٹس وصول کرا دیا ہے ۔190گھرانوں کو 900روپے مرلہ مالکانہ حقوق دئیے گئے اور دونوں شخصیات مالکانہ حقوق دینے والی کمیٹی میں شامل تھے۔ ماجد ظہور کو بطور یوسی ناظم طلب کیا گیا ہے۔
