لاہور(این این آئی) مسلم لیگ(ن)پنجاب کی سیکرٹری اطلاعات عظمی بخاری نے کہا ہے کہ شہبازشریف نے سپیکر قومی اسمبلی کو قومی ایشوز پر خط لکھا اور پریشانی فیاض چوہان کو ہورہی ہے،فیاض چوہان ہر معاملے میں ٹانگ اڑانا اپنی ڈیوٹی سمجھتے ہیں،فیاض چوہان کی مثال توں کون میں

خام خواہ والی ہے۔ عظمی بخاری نے فیاض الحسن چوہان کے بیان پر ردعمل کااظہارکرتے ہوئے کہاکہ چوہان صاحب قومی ایشوز کی بات ہورہی ہے،جب دو بڑے بات کریں تو خاموش رہتے ہیں،یہ آپ سے بہت اوپر کی بات ہے،جن لوگوں سے اپنی وزارتیں چلائی نہیں جارہی وہ شہباز شریف پر تنقید کرکے اپنی کارکردگی رپورٹس ٹھیک کرنے کی کوشش کررہے ہیں۔انہوںنے کہاکہ تنقید برائے تنقید کی سیاست سے کارکردگی رپورٹیں کبھی درست نہیں آسکتی،جن کے رپورٹیں پہلے دن سے ہی خراب آرہی ہیں وہ اب کیسے ٹھیک ہو سکتی ہیں۔حکومتی ترجمانوں میں چمچہ گیری اورچاپلوسی میں آگے بڑھنے کی ریس لگی ہے۔ملک تباہی کے دہانے پر کھڑا ہے اور خوشامدیوں کا ٹولہ گندی سیاست کرنے میں مصروف ہے۔ا نہوںنے کہاکہ میڈیا سے مطلوبہ نتائج حاصل نہ ہونے پر دھمکا یا جارہا ہے۔دھاندلی زدہ حکومت میڈیا پر بھی دھاندلی زدہ خبریں چلوانا چاہتی ہے۔دھاندلی سے حکومتیں بن سکتی ہیں لیکن کارکردگی دیکھانے کیلئے لیڈرشپ اور دماغ کی ضرورت ہے ۔تحریک انصاف کے پاس لیڈر شپ اور دماغ کا شدید ترین فقدان ہے۔