لاہور(این این آئی) صوبائی وزیر اطلاعات فیاض الحسن چوہان نے کہا ہے کہ حمزہ شہباز جیسے کرپٹ اور بد دیانت سیاستدان معاشرے میں کرونا سے زیادہ خطرناک ہیں۔ انہوں نے کہا کہ انتظامی و سیاسی صلاحیتوں کے فقدان کے باوجود حمزہ شہباز کی ترقی عظیم الشان اقربا پروری کے بغیر ممکن نہ تھی۔ حمزہ شہباز نے اپنے والد کے نقش قدم پر چلتے ہوئے آمدن سے زائد اثاثہ جات اور منی لانڈرنگ کے ذریعے
اپنی اور اپنے خاندان کے دیگر افراد کی جیبیں بھریں۔ فیاض الحسن چوہان نے کہا کہ وزیراعظم عمران خان کی ہدایات پر ملک میں احتساب کا بغل بج چکا، اب آلِ شریف سمیت سب کرپٹ عناصر پکڑے جائیں گے۔ ان خیالات کا اظہار وزیرِ اطلاعات پنجاب فیاض الحسن چوہان نے محکمہ اطلاعات و ثقافت میں آنے والے نو منتخب انفارمیشن افسران کے تربیتی سیشن کے اختتام پر ویڈیو لنک کے ذریعے خطاب کرتے ہوئے کیا۔ نئے آنے والے انفارمیشن افسران کی تربیت کے لیے سماجی دوری کو ملحوظ خاطر رکھتے ہوئے جدید ٹیکنالوجی کا استعمال کیا گیا۔ وزیر اعلی پنجاب سردار عثمان بزدار کی ہدایت پر وزیرِ اطلاعات پنجاب فیاض الحسن چوہان نے نئے آنے والے افسران کے لیے سات روزہ آن لائن تربیتی کورس کا اہتمام کیا تھا۔ نو منتخب افسران سے سیکرٹری اطلاعات راجہ جہانگیر اور ڈی جی پی آر اسلم ڈوگر نے بھی خطاب کیا۔ اس موقع پر وزیر اطلاعات پنجاب نے کہا کہ وزیر اعلی پنجاب کی خصوصی ہدایت اور دلچسپی کو مدنظر رکھتے ہوئے ڈی جی پی آر کی تاریخ میں پہلی دفعہ نئے آنیوالے افسران کی تربیت کا اہتمام کیا گیا ہے۔ اس کاوش پر ڈائریکٹر جنرل، ڈی جی پی آر اسلم ڈوگر اور ان کی ٹیم مبارکباد کی مستحق ہے۔ فیاض الحسن چوہان نے مزید کہا کہ کرونا وبا کے دنوں میں ٹیکنالوجی کا اس سے بہتر اور مثبت استعمال ممکن نہیں تھا۔ انہوں نے مزید کہا کہ ہمیں محکمہ اطلاعات میں نئے منتخب ہونے والے افسران سے بہترین کارکردگی کی توقع ہے۔ امید ہے نئے افسران حکومتی کارکردگی اور مثبت پالیسیز کو مزید بہتر انداز میں عوام تک پہنچانے کا فریضہ بخوبی سر انجام دیں گے۔
