اسلام آباد(آن لائن) وزیراعظم کے ترجمان برائے سیاسی امور ڈاکٹر شہباز گل صحافی کے سوال پر حواس باختہ ہوگئے اور صحافی کے خلاف انتہائی سخت زبان استعمال کی۔گزشتہ روز ڈاکٹر شہباز گل اسلام آباد میں پریس کانفرنس کر رہے تھے ایک صحافی نے سوال کیا کہ ڈاکٹر صاحب آپ پر الزام ہے کہ قائداعظم یونیورسٹی سے آپ کو نکالنے کی وجہ جنسی ہراسگی بنی اور دوسرا الزام ہے کہ آپ سی آئی اے کے پے رول ہیں۔
دوران پریس کانفرنس ڈاکٹر شہباز گل سوال کا جواب گول کر گئے مگر پریس کانفرنس کے اختتام پر ڈاکٹر شہباز گل آپے سے باہر ہوگئے اور سوال کرنے والے صحافی کو مخاطب کرتے ہوئے کہا کہ مجھے نہیں پتہ تھا کہ آپ میرے لئے اپنی بہن کا رشتہ لے کر آئے تھے جس پر وہاں موجود صحافیوں اور ڈاکٹر شہباز گل میں تلخ کلامی ہوگئی۔ صحافتی تنظیموں نے اس حوالے سے کہا کہ وزیراعظم ہاؤس کو خط لکھا جائے گا اور ڈاکٹر شہباز گل سے معافی کا مطالبہ کیا ہے۔
