اسلام آباد(این این آئی) پمز ہسپتال میں وانا سے سابق رکن صوبائی اسمبلی عارف وزیر کا پوسٹ مارٹم مکمل کرلیا گیا جس کے مطابق پوسٹ مارٹم رپورٹ کے مطابق عارف وزیر کے دماغ میں گولی لگنے سے ہلاکت ہواقع ہوئی۔ترجمان پمز کے مطابق عارف وزیر گردوں کے عارضہ میں بھی مبتلا تھے۔ عارف وزیر کا پوسٹ مارٹم ڈاکٹر فرخ کمال ڈاکٹر نصرین اور ڈاکٹر امتیاز نے مکمل کیا۔ قبل ازیں سابق رکن اسمبلی دماغ میں گولی لگنے سے جاں بحق ہو گیا
اسلام آباد(مانیٹرنگ ڈیسک)جنوبی وزیرستان کے علاقے وانا میں فائرنگ سے زخمی ہونے والے پشتون تحفظ موومنٹ (پی ٹی ایم) کے رہنما عارف وزیر ہفتے کو زخموں کی تاب نہ لاتے ہوئے چل بسے۔ وانا کے سٹیشن ہاؤس افسر (ایس ایچ او) عثمان خان نے ان کی موت کی تصدیق کی۔واضح رہے کہ حملے کے بعد انہیں علاج کے لیے اسلام آباد منتقل کیا گیا تھا جہاں وہ دم توڑ گئے۔ قبل ازیں ایک عہدیدار نے بتایا تھا کہ جمعہ کو عارف وزیر پر وانا کے قریب غواہ خواہ میں ان کے گھر کے باہر گاڑی میں سوار مسلح افراد نے فائرنگ کی تھی۔عہدیدار نے بتایا تھا کہ عارف وزیر کو گولی لگنے سے شدید زخم آئے تھے اور وہ تشویشناک حالت میں تھے۔ ابتدائی طور پر انہیں ڈسٹرکٹ ہیڈکوارٹر ہسپتال میں داخل کیا گیا لیکن بعد ازاں علاج کے لیے انہیں اسلام آباد منتقل کردیا گیا۔واضح رہے کہ عارف وزیر رکن قومی اسمبلی اور پی ٹی ایم رہنما علی وزیر کے کزن ہیں۔ واقعے پر موجود عینی شاہدین نے بتایا تھا کہ عارف وزیر کے گارڈز کے ساتھ فائرنگ کے تبادلے میں 2 حملہ آور بھی زخمی ہوئے تاہم مسلح افراد ہوائی فائرنگ کرتے ہوئے فرار ہوگئے۔خیال رہے کہ عارف وزیر کے خاندان کے 7 لوگ سال 2007 میں وانا میں عسکریت پسندوں کے ساتھ جھڑپ میں ہلاک ہوچکے ہیں، جس میں ان کے والد سعداللہ جان اور انکل مرزا عالم بھی شامل تھے۔