اسلام آباد (مانیٹرنگ ڈیسک) اسلام آباد میں کرونا وائرس کے مشتبہ مریضوں کی تعداد بڑھنے کے خدشے کے پیش نظر اسلام آباد انتظامیہ الرٹ ہے اور تین بڑی عمارتیں قرنطینہ قرار دے دی گئی ہیں، ڈاکٹر اور فوکل پرسنز بھی تعینات کر دیے گئے ہیں۔
ایک نجی ٹی وی چینل کی رپورٹ کے مطابق تینوں قرنطینہ سینٹرز کے انچارج اور فوکل پرسنزتعینات کر دیے گئے ہیں، جس کا نوٹیفیکیشن بھی جاری کر دیا گیا ہے۔ اس نوٹیفیکیشن کے مطابق پہلا قرنطینہ پاک چائنہ فرینڈ شپ سینٹر میں قائم کیا گیا جہاں ڈاکٹر سرتاج کو نگران مقرر کر دیا گیا۔ حاجی کیمپ کو دوسرا قرنطینہ قرار دیا گیا ہے اس سینٹر کی نگرانی ڈاکٹر صابر ایوب کریں گے۔ او جی ڈی سی ایل بلڈنگ آئی نائن کو تیسرا قرنطینہ سینٹر قرار دیا گیا ہے۔ اس سینٹر کی نگرانی ڈاکٹر ولید کریں گے جبکہ ڈائریکٹر ایکسائز بلال اعظم، اسٹنٹ کمشنر گوہر زمان، مہرین بلوچ فوکل پرسن مقرر کر دیے گئے ہیں۔ خدانخواستہ اگر صورتحال بگڑتی ہے تو مزید قرنطینہ سینٹر بنانے کے لئے دو نجی ہوٹلز کو بھی شامل کیا جائے گا۔
