اسلام آباد (این این آئی)سپریم کورٹ نے سوشل میڈیا پر فیک آئی ڈی بنا کر گستاخانہ مواد کی تشہیر کرنے والے ملزم شوکت علی کی ضمانت معاملے پر ایف آئی اے کو شکایت کنندہ کے خلاف بھی تحقیقات کرنے کی ہدایت کردی۔ بدھ کو سپریم کورٹ میں سوشل میڈیا پر فیک آئی ڈی بنا کر گستاخانہ مواد کی تشہیر کرنے والے ملزم شوکت علی کی ضمانت معاملے پر سماعت جسٹس مشیر عالم کی سربراہی میں
دو رکنی بینچ نے کی، جسٹس مشیر عالم نے وکیل سے استفسار کیا کہ فیس بک پر آپ کے موکل نے فیک آئی ڈی بنائی۔ وکیل درخواست گزار نے کہاکہ میرے نام سے کسی اور نے آئی ڈی بنائی۔ جسٹس قاضی امین نے کہاکہ یاسر قاسمی نامی شخص کی شکایت پر پولیس میں تحقیقات شروع کردی۔ تفتیشی افسر ایف آئی اے نے کہاکہ ہائیکورٹ کے حکم پر تحقیقات شروع کی گئی۔ ایف آئی اے حکام نے کہاکہ شکایت کنندہ یاسر قاسمی جی نائن فور کا رہائشی ہے اور مسجد امام کا بیٹا ہے۔ جسٹس قاضی محمد امین نے کہاکہ شکایت کرنے والے کی بھی تحقیقات ہونی چاہیے۔ ایف آئی اے حکام نے کہاکہ دونوں کا آپس میں کوئی تعلق نہیں فیس بک کے زریعے ایک دوسرے کے سامنا ہوا ہے۔ایف آئی اے حکام نے بتایاکہ ملزم شان رسالت ؐپر مخالف پوسٹس شیئر کرتا تھا۔ جسٹس قاضی محمد امین نے کہاکہ امام مسجد کاکام نماز پڑھانا ہے۔ جسٹس قاضی محمد امین نے کہاکہ اپنے مذہب عقیدے کے ساتھ ٹھیک رہیں دوسروں کے عقیدوں میں مداخلت نہیں ہونی چاہیے۔ انہوںنے کہاکہ اسلام امن کا مذہب ہے۔ انہوںنے کہاکہ ایسے لوگوں کی حوصلہ شکنی کرنی چاہیے۔عدالت نے ایف آئی اے کو شکایت کنندہ کے خلاف بھی تحقیقات کرنے کی ہدایت کردی۔ بعد ازاں عدالت نے سماعت غیر معینہ مدت کیلئے ملتوی کردی
