لاہور( این این آئی) پاکستان تحریک انصاف کے مرکزی رہنما، انصاف ویلفیئر ونگ کے سیکرٹری جنرل جمشید اقبال چیمہ نے کہا ہے کہ حکومت مشکل کی اس گھڑی میں عوام کو تنہا نہیں چھوڑے گی ،کوروناوائرس کی تباہ کاروں کی روک تھام کے لئے محکمہ صحت اور پنجاب ڈیزاسٹرمینجمنٹ یونٹ کیلئے 7.62ارب روپے کا پیکج جاری کر دیا گیا ہے ، وفاقی اور صوبائی سطح پر
خصوصی فنڈ کاقیام بھی عمل میں لایا گیا ہے جبکہ نجی شعبہ بھی اس سلسلہ میں اپنا مثبت اور فعال کردار ادا کر رہا ہے ۔ کورونا وائرس کے پھیلائو کو روکنے کیلئے آگہی مہم کے سلسلہ میں گفتگوکرتے ہوئے جمشید اقبال چیمہ نے کہا کہ اگر ہم نے اس وائرس کوشکست دینی ہے تو ہمیں حفاظتی تدابیر پر سختی سے عمل پیرا ہونا پڑے گا ہم جتنی جلد اس وباء پر قابو پا لیں گے ہماری معیشت اتنی زیادہ اس کے منفی اثرات سے محفوظ رہے گی ۔ انہوں نے کہا کہ کوروناوائرس کی وجہ سے ترقی یافتہ ممالک کی معیشتیں ہل کر رہ گئی ہیں،وزیر اعظم عمران خان نے اس سلسلہ میں خصوصی اقدامات اٹھائے ہیںاور منفی اثرا ت کو زائل کرنے کے لئے عملی اقدامات شروع کر دئیے گئے ہیں۔ ہم نے مضبوط اتحاد کے ذریعے اس مشکل کامقابلہ کرناہے اور انشااللہ ہم سرخروہوں گے اور دوبارہ ترقی کے سفر کا آغاز کریں گے۔
