عبدالحکیم (این این آئی ) پاکستان مسلم لیگ ن کے ناراض رہنما رکن صوبائی اسمبلی نشاط احمد خان ڈاہا نے کہا کہ مسلم لیگ ن اپنے ممبران کا حال تک نہیں پوچھتی اور نہ ہی اپنے ممبران کا کوئی خیال کرتے ہیں اور نہ ہی کسی ممبر سے ملنا گوارا کرتے ہیں ۔

انہوں نے کہا کہ میں تمام پارٹیوں سے ہاتھ جوڑ کر التجا کرتا ہوں کہ دنیا بھر میں پھیلے موذی مرض کرونا وائرس بیماری کا مل جل کر اور حکومت سے تعاون کرکے اس بیماری کے خاتمے کیلئے جدوجہد کریں تاکہ اس موذی مرض کا مقابلہ کیا جا سکے اور اس بیماری سے اپنی قوم کے مستقبل کو محفوظ رکھا جا سکے، انہوں نے کہا کہ اس وقت پاکستان میں چار بڑی پارٹیاں ہیں اسوقت پاکستان تحریک انصاف کو عروج حاصل ہے دوسری پارٹی ق لیگ حکومت کی اتحادی پی پی اور ن لیگ اپوزیشن جماعتیں ہیں انکو مل جل کر ملک و قوم کی فکر کرنی چاہیے ،انہوں نے کہا کہ مسلم لیگ ن اب ووٹ کو عزت دیگی پہلے دور میں ن لیگ ووٹ کو عزت نہیں دیتی تھی اب حالات کے مطابق انکو ووٹ کو عزت دینا ہو گی ،ایک سوال کے جواب میں نشاط احمد خان ڈاہا نے کہا کہ پرانے زمانے میں ملتان ایک ملک ہوتا تھا اب ملتان ڈویژن ہے جنوبی پنجاب کو صوبہ بنانا چاہیے اور اس کا سیکرٹریٹ ملتان ہونا چاہیے، لاہور میں براجمان سیکرٹری صرف لاہور تک ہی محدود ہیں، انہوں نے آج تک پورے صوبہ پنجاب کا چکر نہیں لگایا، انہوں نے مزید کہا کہ ملتان کو جو ترقی ملنا چاہیے تھی وہ آج تک نہیں ملی اسکی تنزلی کے ذمہ دار سابقہ حکومتیں ہیں ،ملتان کو ہر حال میں جنوبی پنجاب کا سیکرٹریٹ بننا چاہیے ۔

موضوعات:نشاط ڈاہا