سرگودھا(این این آئی)سی ای او (ایجوکشن) سرگودھاکے احکامات پر جماعت ہشتم کے امتحان میں نقل کروانے کے الزام کا نوٹس لیتے ہوئے امتحانی سنٹر کا عملہ معطل کر کے تحقیقات کا حکم دے دیا۔ جبکہ ایک اور سکول چھاپہ میں غیر متعلقہ اساتذہ کو پکڑ کر معطل کر کے وضاحت طلب کر لی گئی۔ زرائع کے مطابق سرگودھا کی تحصیل سائیوال ڈپٹی ڈی ای او عبدا لرؤف نے گورنمنٹ ایلمنٹری سکول نمبر 1فروکہ میں
پنجاب ایگزامینیشن کمیشن کے تحت جاری جماعت ہشتم کے امتحانات میں سائنس کے پرچہ کے دوران چھاپہ مارا تو امتحانی سنٹر پر تعینات نگران عملہ طلباء کو نقل کرواتے پایاگیا۔ جس کی ڈپٹی ڈی ای او نے رپورٹ مرتب کر کے احکام کا آگاہ کر دیا۔جس پر سی ای او(ایجوکیشن) ریاض قدیر بھٹی نے نقل کیس کا فوری نوٹس لیتے ہوئے امتحانی سنٹر کے سپرنٹنڈنٹ محمد رمضان، ڈپٹی سپرنٹنڈنٹ حافظ محمد انور اور دیگر نگران عملہ امان اللہ،پرویز مہدی،امیر حمزہ،محمد طارق،خالق داد،محمد مبین احمد،محمد ریاض الحق،محمد محبوب اور مشکور حسین کو فوری طور پر معطل کرنے کے احکامات جاری کرتے ہوئے محکمانہ تحقیقات کا حکم دے دیا اور متعلقہ افسران کو نقل کروانے والے معطل 12 نگران عملہ اساتذہ کی جگہ امتحانی سنٹر پر نیا عملہ تعینات کردیا۔ علاوہ ازیں ڈپٹی ڈی ای او سائیوال نے موضع حویلی مجوکہ کے گورنمنٹ ہائی سکول میں چھاپہ مارا تو وہاں دو غیر متعلقہ اساتذہ موجود پائے گئے جن کی نہ تو وہاں ڈیوٹی تھی اور نہ ہی تعیناتی تھی۔سی ای او (ایجوکیشن) کے احکامات پر ان دونوں اساتذہ کو بھی معطل کر کے تحقیقات شروع کر دی گئی ہے۔
