راولپنڈی، اسلام آباد (این این آئی)گندم بحران سے پیدا ہونے والی صورتحال پر پنجاب حکومت کے اقدامات ، ڈپٹی کمشنر راولپنڈی کو تبدیل کردیاگیا۔ منگل کو ڈپٹی کمشنر سیف اللہ ڈوگر کو ایس اینڈ جی اے ڈی رپورٹ کر نے کا حکم جاری کر دیا گیا ،حکومت پنجاب نے کیپٹن ریٹائرڈ انوار الحق کو ڈپٹی کمشنر راولپنڈی تعینات کردیا ،چیف سیکرٹری پنجاب اعظم سلیمان خان نے رات گئے نوٹیفکیشن جاری کر دیا۔دریں اثناچیئرمین قائمہ کمیٹی برائے داخلہ
سینیٹر رحمان ملک نے آٹا، چینی، گھی و دیگر اشیائے خورد و نوش کے اسمگلنگ کا نوٹس لے لیا ۔ ایک بیان میں سینیٹر رحمان ملک نے وزارت داخلہ، ہوم سیکرٹری سندھ و خیبرپختونخوا سے آٹا، چینی و گھی کے اسمگلنگ پر رپورٹ طلب کرلی ۔ رحمن ملک نے کہاکہ بلوچستان و خیبرپختونخوا کے ذریعے آٹا، چینی و گھی افغانستان اسمگل ہو رہا ہے، آٹا، چینی و گھی کے اسمگلنگ کے پیچھے کارفرما مافیہ کے خلاف سخت اقدامات کئے جائیں۔
