لاہور (این این آئی)پی ایس ایل میں آسٹریلیا کے بیٹر مارنوس لیوشن اور سابق آسٹریلوی کپتان اسٹیو سمتھ بھی پی ایس ایل میں اپنی صلاحیتوں کے جوہر دکھائیں گے۔

تفصیلات کے مطابق پاکستان سپر لیگ کے آنے والے سیزن سے قبل آسٹریلیا کے دو بڑے نام پہلی بار پی ایس ایل کا حصہ بن گئے ہیں جس سے لیگ کی عالمی اہمیت میں مزید اضافہ ہوگیا ہے۔آسٹریلیا کے نامور بیٹر مارنوس لبوشین نے پہلی مرتبہ پاکستان سپر لیگ میں شرکت کا فیصلہ کیا اور پی ایس ایل کی فرنچائز حیدرآباد نے انہیں ڈائریکٹ سائننگ کے ذریعے اپنی ٹیم میں شامل کر لیا ہے۔لبوشین کا شمار آسٹریلیا کے ٹاپ آرڈر کے قابلِ اعتماد بیٹرز میں ہوتا اور ان کی شمولیت حیدرآباد اسکواڈ کے لیے بڑی تقویت سمجھی جا رہی ہے،یہ بات قابلِ ذکر ہے کہ مارنوس لبوشین اس سے قبل صرف آسٹریلیا کی بگ بیش لیگ اور انگلینڈ کے ٹی ٹوئنٹی بلاسٹ میں شرکت کر چکے ہیں جبکہ پاکستان سپر لیگ میں ان کی یہ پہلی شمولیت ہوگی جس کا شائقین کو بے صبری سے انتظار ہے۔

دوسری جانب سابق آسٹریلوی کپتان اور اسٹار بیٹر اسٹیو اسمتھ کو سیالکوٹ اسٹالینز نے ڈائریکٹ سائننگ کے ذریعے اپنی ٹیم کا حصہ بنا لیا اسٹیو اسمتھ کی شمولیت نے لیگ کو مزید توجہ کا مرکز بنا دیا ہے جبکہ وہ بابر اعظم اور شاہین شاہ آفریدی کے ساتھ پی ایس ایل کی تاریخ کے مہنگے ترین کھلاڑیوں میں شامل ہو چکے ہیں۔آسٹریلیا کے ان دو عالمی معیار کے بیٹرز کی شمولیت سے نہ صرف پی ایس ایل کا معیار مزید بلند ہوگا بلکہ شائقین کو عالمی سطح کی کرکٹ دیکھنے کا موقع بھی ملے گا۔