اسلام آباد (نیوز ڈیسک) آن لائن جوئے کی ایپس کی تشہیر سے متعلق مقدمے میں اہم پیش رفت سامنے آ گئی ہے، جہاں معروف یوٹیوبر سعد الرحمان المعروف ڈکی بھائی اور ان کی اہلیہ عروب جتوئی پر باضابطہ طور پر فردِ جرم عائد کر دی گئی ہے۔
ذرائع کے مطابق ضلع کچہری میں آن لائن جوئے کی پروموشن سے متعلق کیس کی سماعت ہوئی، جس میں ڈکی بھائی سمیت دیگر ملزمان عدالت کے روبرو پیش ہوئے۔ سماعت کے دوران عدالت نے ڈکی بھائی، ان کی اہلیہ اور شریکِ ملزمان پر الزامات کی فردِ جرم عائد کی۔تمام ملزمان نے عدالت میں الزامات تسلیم کرنے سے انکار کرتے ہوئے صحتِ جرم سے انکار کیا۔ کیس کی کارروائی کے دوران جوڈیشل مجسٹریٹ نعیم وٹو نے استغاثہ کے گواہوں کو 23 فروری کو پیش ہونے کے لیے طلب کر لیا۔واضح رہے کہ نیشنل سائبر کرائم انویسٹی گیشن ایجنسی (این سی سی آئی اے) کی جانب سے سعد الرحمان عرف ڈکی بھائی اور دیگر افراد کے خلاف آن لائن جوئے کی تشہیر کے الزام میں مقدمہ درج کیا جا چکا ہے، جس پر مزید قانونی کارروائی جاری ہے۔
