لاہور(این این آئی)وفاقی وزیر سائنس و ٹیکنالوجی فواد چوہدری نے کہا ہے کہ راناثنااللہ اور شہریارآفریدی کو قرآن نہیں اٹھانا چاہیے تھا اگرمیں اسپیکر ہوتا تو دونوں کو 15،15دن کیلئے معطل کر دیتا۔نجی ٹی وی سے گفتگو کرتے ہوئے فواد چوہدری نے کہا کہ ملک کے تمام اداروں کوایک پیج پر ہونا چاہیی اگر ادارے ایک پیج پرنہ ہوئے توملک انار کی طرف چلا جائے گا۔
انہوں نے کہا کہ فوج پی ٹی آئی کی نہیں بلکہ تمام سیاسی جماعتوں کی ہے، بل کی حمایت میں ووٹ دے کر (ن) لیگ اور پی پی نے بہت اچھا کام کیا۔فواد چوہدری نے کہا کہ جاویدلطیف خواجہ آصف کے وزیراعظم بننے کیخلاف ہیں، جاویدلطیف بتائیں خواجہ آصف اور شاہدخاقان کے درمیان کیاجھگڑا ہے، نوازشریف اورآصف زرداری اپنی اننگزکھیل چکے ہیں، دونوں کی سیاست اب باقی نہیں رہی، آصف زرداری نے بلاول بھٹو کو آگے کر دیا ہے، یہ نہیں ہوسکتا کہ بل کی حمایت کا مریم نواز اور بلاول کو نہیں پتا تھا۔ انہوں نے کہا کہ میں نے اس وقت بھی کہا تھا نوازشریف کو با ہر نہیں جانا چاہیے، نوازشریف لندن میں ایک دن بھی ہسپتال میں داخل نہیں ہوئے، ڈاکٹرزکی ہدایت پر نوازشریف کو باہر جانے دیا گیا اب ڈاکٹرز پر انکوائری بیٹھنی چاہیے جنہوں نے کہا نوازشریف بہت بیمار ہیں۔انہوں نے کہا کہ ایم کیو ایم اور (ق)لیگ کے گلے شکوے درست ہیں،ایم کیو ایم نے کہا وزارت چھوڑ رہے ہیں مگر حکومت نہیں۔
