اسلام آباد(آن لائن)وفاقی دارالحکومت میں قائم اسلامک انٹرنیشنل یونیورسٹی میں دو طلبہ تنظیموں کے مابین ہونے والے تصادم کے باعث ایک طالبعلم جاں بحق اور 13 طلبا زخمی ہوگئے،دو کی حالت تشویش ناک۔میڈیا رپورٹس کے مطابق

گذشتہ روز اسلامک انٹرنیشنل یونیورسٹی میں اس وقت اسلامی جمعیت طلبہ اور سرائیکی اسٹوڈنٹس کونسل کے درمیان تصادم ہوا جب نائب امیر جماعت اسلامی لیاقت بلوچ اسلامی جمعیت طلباء کی تقریب سے خطاب کررہے تھے۔ترجمان جماعت اسلامی ارشد عمر اولکھ نے میڈیا کو بتایاکہ حملے میں لیاقت بلوچ کے قریب کھڑے ایک اسٹوڈنٹ کی ٹانگ، دوسرے کے پیٹ میں گولیاں لگیں،انہوں نے بتایا کہ حملے میں زخمی ہونیوالے طفیل نامی طالب علم جاں بحق ہوگیا ہے جبکہ اسلامی جمعیت کے تین طلباء زخمی ہیں۔انہوں نے کہا کہ یونیورسٹی میں کتاب میلے کا انتظام کیا گیا تھا جس کا آج آخری دن تھا،انہوں نے بتایا کہ نائب امیر جماعت اسلامی لیاقت بلوچ جب تقریب سے خطاب کررہے تھے تو اسی دوران تقریب پرسرائیکی اسٹوڈنٹ کونسل نے حملہ کیا۔پمز ہسپتال زرائع کے مطابق تصادم میں دو زخمی طلبا کی حالت تشویشناک بتائی جارہی ہے جن کی جان بچانے کے لیے ڈاکٹروں کی ٹیم پوری کوشش کررہی ہے۔ڈپٹی کمشنر اسلام آباد کے مطابق رینجرز کو طلب کرلیا گیا ہے جب کہ علاقہ مجسٹریٹ اور پولیس جائے وقوع پر پہنچ گئے ہیں۔ یونیورسٹی انتظامیہ کے مطابق آج یونیورسٹی بند رہے گی۔