کراچی(این این آئی)رویت ہلال کمیٹی کے چیئرمین مفتی منیب الرحمن نے کہاہے کہ وزیراعظم عمران خان نے کشمیرکی ترجمانی کا حق اداکردیاہے،جنرل اسمبلی میں کسی اسلامی اور پاکستانی حمیت کے حامل وزیر اعظم کا پہلا جاندار اور تاریخی خطاب تھا۔
ہفتہ کو جاری اپنے بیان میں مفتی منیب الرحمن نے کہاکہ وزیرِ اعظم عمران خان نے اہلِ کشمیر سے وعدہ کیا تھاکہ میں اقوامِ متحدہ کی جنرل اسمبلی میں آپ کی ترجمانی کروں گا، اس میں کوئی شک نہیں کہ انہوں نے بے حس اور انسانی حرمت کے جذبات سے عاری حاضرین کے سامنے ترجمانی کا حق ادا کردیا۔انہوں نے کہاکہ وزیراعظم نے اسلاموفوبیا پر مدلل گفتگو کی ،ماحولیات کی بربادی کی طرف متوجہ کیا اور عالمی طاقتوں کو بتایا کہ پسماندہ اور ترقی پذیر ممالک میں کرپشن کے اصل سرپرست اور پشتیبان وہ ہیں اور لوٹی ہوئی دولت کے لیے آف شور کمپنیز کی صورت میں کمین گاہیں انہوں نے بنا رکھی ہیں۔انہوں نے کہاکہ شاید جنرل اسمبلی میں کسی اسلامی اور پاکستانی حمیت کے حامل وزیر اعظم کا پہلا جاندار اور تاریخی خطاب تھا۔انہوں نے مفصل ،مدلل اور پراعتماد انداز میں گفتگو کی ،ان کی گفتگو میں مرعوبیت اور دفاعی انداز نام کو نہ تھا،بلکہ فرنٹ فٹ پر آکر انہوں نے انسانیت کے خفتہ ضمیر کو للکارا ،وہ عالمِ اسلام کے ترجمان اور ناموسِ رسالت ؐکے پاسبان نظر آرہے تھے۔مفتی منیب الرحمن نے کہاکہ مسلم حکمرانوں کی بے حسی اور مرعوبیت کی طرف بھی انہوں نے متوجہ کیا، اسلاموفوبیاپر جارحانہ گفتگو کی ،وقت کا تقاضا یہی تھا، ہم ان کوپوری پاکستانی قوم کی طرف سے باحمیت ترجمانی پر دلی مبارک باد پیش کرتے ہیں۔
