اسلام آباد (آن لائن) وزیراعظم کے ترجمان ندیم افضل چن نے کہا ہے کہ اپوزیشن سے سن رہے ہیں کہ میاں صاحب ڈیل کے لئے نہیں مان رہے‘ اصل میں شہباز شریف اور نواز شریف کا اندرونی معاملہ ہے اور ان کی آپس میں لڑائی چل رہی ہے‘ اپوزیشن وضاحت کرے کہ کون ڈیل چاہتا ہے اور کون ڈیل نہیں چاہتا۔ انہوں نے کہا کہ حکومت پہلے ہی کہہ چکی ہے کہ ہمارا ان کیسز سے کوئی تعلق نہیں ہے کرپشن کیسز عدالتوں میں ہیں ان کا سامنا کریں۔ ترجمان وزیراعظم کا کہنا تھا کہ حکومت کے لئے اس وقت اصل
مسئلہ کشمیر اور عوام کے مسائل ہیں۔ انہوں نے اپوزیشن پر اپنی تنقید جاری رکھتے ہوئے مزید کہا کہ یہ لوگ ملک کو ڈبو کر گئے۔ اب انہیں چاہئے کہ پارلیمنٹ میں آ کر بیٹھیں اور عوام کو جواب دیں۔ عوام خوش ہیں کہ ان لوگوں سے آزادی ملی۔ انہوں نے مزید کہا کہ حکومت کی کارکردگی اچھی نہ ہوتی تو عوام احتساب کا حق رکھتے ہیں۔ حکومت اپنی مدت پوری کرے گی‘ کارکردگی سے متعلق عوام فیصلہ کریں گے۔